ডিজিটেল ডেস্কঃ ভাৰতীয় মূলৰ সাহিত্যিক ছলমান ৰুছদিক আক্ৰমণ কৰা লোকজনক ইৰাণ চৰকাৰে পুৰস্কৃত কৰিব। যোৱা আগষ্ট মাহত নিউয়ৰ্কত ৰুছদিক আক্ৰমণ কৰা হাদি মাতাৰ নামৰ এই লোকজনৰ বাবে এটা বঁটা ঘোষণা কৰিছে আলী হোছেইনী খোমেইনীৰ দেশখনে।
ইৰাণৰ চৰকাৰী টিভিয়ে মঙলবাৰে প্ৰকাশ কৰা অনুসৰি, চৰকাৰী সমৰ্থিত ট্ৰাষ্টে হাদীক ১০০০ বৰ্গমিটাৰ কৃষিভূমি প্ৰদানৰ সিদ্ধান্ত লৈছে।
অৱশ্যে ৰুছদীক আক্ৰমণ কৰা ২৫ বছৰীয়া হাদী এতিয়া নিউয়ৰ্কৰ কাৰাগাৰত। তেওঁৰ বিৰুদ্ধে গোচৰ চলি আছে। এতিয়া তেওঁৰ বাবে বঁটা গ্ৰহণ কৰাটো সম্ভৱ নহয়।
ইৰাণৰ সৰ্বোচ্চ ধৰ্মীয় নেতা খোমেইনীৰ নামেৰে নামাকৰণ কৰা ট্ৰাষ্টৰ মুৰব্বী মহম্মদ ইছমাইল জাৰেইয়ে মঙলবাৰে কয়- ''ৰুছদী এতিয়া কাৰ্যতঃ মৃত্যুমুখী। আক্ৰমণটোৰ বাবেই এয়া সম্ভৱ হৈছে। গতিকে আমি হাদীক হাজাৰ হাজাৰ বৰ্গমিটাৰ কৃষিভূমি দিম। ইচ্ছা কৰিলে হাদীৰ নিৰ্দিষ্ট প্ৰতিনিধিৰ হাতত এই মাটি গতাই দিয়া হ’ব।’’
উল্লেখ্য যে আশীৰ দশকত ইৰাণত আলী খোমেইনীৰ পূৰ্বৰ আয়াতুল্লাহ খোমেইনীৰ শাসন চলি থকাৰ সময়ত ‘চাটানিক ভাৰ্চেজ’ উপন্যাসখন লিখাৰ ‘অপৰাধ’ৰ বাবে ৰুছদিৰ বিৰুদ্ধে ‘মৃত্যুৰ ফাতোৱা’ জাৰি কৰা হৈছিল। সেয়ে ৰুছদীয়ে এদশকৰো অধিক সময় আত্মগোপন কৰিবলগীয়া হৈছিল। সেই সময়ত তেওঁ জোচেফ এণ্টন ছদ্মনাম লৈছিল।
Continue Reading
