ডিজিটেল ডেস্ক: আৰম্ভ হৈছে কংগ্ৰেছ আৰু বিজেপিৰ মাজত পোষ্টাৰ যুদ্ধ৷ সামাজিক মাধ্যমত তীব্ৰতৰ হৈ পৰে দুয়োটা দলৰ ‘পোষ্টাৰ ৱাৰ’৷
শাসকীয় দল বিজেপিয়ে তীব্ৰ শ্লেষাত্মকভাৱে ছ’চিয়েল মিডিয়া প্লেটফৰ্ম ‘এক্স’ৰ ওপৰত এখন পোষ্টাৰ শ্বেয়াৰ কৰি ৰাহুল গান্ধীক নতুন যুগৰ ৰাৱণ হিচাপে চিত্ৰায়ণ কৰিছে৷ বিজেপিৰ এই কাৰ্যক তীব্ৰ সমালোচনা কৰিছে বিৰোধী দলসমূহে৷ বিৰোধী দলসমূহে ইয়াক অগ্ৰহণযোগ্য আৰু একেবাৰে বিপজ্জনক বুলি অভিহিত কৰে।
কংগ্ৰেছে ‘এক্স’ত প্ৰধানমন্ত্ৰী মোদীৰ এখন ফটো পোষ্ট কৰাৰ এদিন পাছতে বিজেপিয়ে এই পোষ্টাৰখন প্ৰকাশ কৰিছে৷ কংগ্ৰেছৰ পোষ্টাৰৰ শিৰোনাম আছিল ‘দ্য বিগেষ্ট লায়াৰ’ আৰু ‘জুমলা বয়’ বুলি অভিহিত কৰিছে৷
তীক্ষ্ণ প্ৰত্যুত্তৰত বিজেপিয়ে ‘এক্স’ত দলটোৰ অফিচিয়েল হেণ্ডেলত গান্ধীৰ এখন পোষ্টাৰ শ্বেয়াৰ কৰিছিল যাৰ শিৰোনাম আছিল ‘ভাৰত খাত্ৰে মে হে - এ কংগ্ৰেছ পাৰ্টি প্ৰডাকচন, জৰ্জ চোৰোছৰ দ্বাৰা পৰিচালিত’।
‘নতুন যুগৰ ৰাৱণ ইয়াত আছে। তেওঁ দুষ্ট। ধৰ্ম বিৰোধী। ৰাম বিৰোধী। তেওঁৰ লক্ষ্য হৈছে ভাৰতক ধ্বংস কৰা।’- বিজেপিয়ে এক্সত কৈছিল।
বিজেপিৰ এই আচৰণত প্ৰতিক্ৰিয়া প্ৰকাশ কৰিছে কংগ্ৰেছৰ সাধাৰণ সম্পাদক জয়ৰাম ৰমেশে৷ ৰমেশে কয়, ইয়াৰ উদ্দেশ্য হৈছে প্ৰাক্তন কংগ্ৰেছ মুৰব্বীজনৰ বিৰুদ্ধে হিংসামূলক আচৰণ, যাৰ পিতৃ আৰু আইতাকক ভাৰতক বিভাজন কৰিব বিচৰা শক্তিয়ে হত্যা কৰিছিল।
Continue Reading
