ডিজিটেল ডেস্ক: কাৰাবন্দী আপ নেতা মনীষ চিছোদিয়াৰ বিৰুদ্ধে চিবিআয়ে ৰুজু কৰিছে দুৰ্নীতিৰ নতুন গোচৰ।
কেন্দ্ৰীয় অনুসন্ধান ব্যুৰো (চিবিআই)য়ে দিল্লী চৰকাৰৰ ফিডবেক ইউনিট (এফবিইউ)ত দুৰ্নীতিৰ অভিযোগত আজি কাৰাগাৰত বন্দী আম আদমী পাৰ্টিৰ নেতা মনীষ চিছোদিয়াৰ বিৰুদ্ধে গোচৰ ৰুজু কৰে। ২০১৫ চনত দিল্লীত ক্ষমতালৈ অহাৰ পিছত আপৰ দ্বাৰা এই ফিডবেক ইউনিট গঠন কৰা হৈছিল।
চিবিআইয়ে দাবী কৰে যে ফিডবেক ইউনিট সৃষ্টি আৰু কাম কৰাৰ বেআইনী পদ্ধতিৰ ফলত চৰকাৰী কোষাগাৰৰ প্ৰায় ৩৬ লাখ টকাৰ লোকচান হৈছে।
কাৰাগাৰত বন্দী আপ নেতাজনৰ বিৰুদ্ধে আন এটা গোচৰ ৰুজু কৰাত তীব্ৰ প্ৰতিক্ৰিয়া ব্যক্ত কৰি দিল্লীৰ মুখ্যমন্ত্ৰী অৰবিন্দ কেজৰিৱালে এই পদক্ষেপক দেশৰ বাবে দুখজনক বুলি অভিহিত কৰে।
কেজৰিৱালে টুইট কৰি কয়, প্ৰধানমন্ত্ৰীৰ পৰিকল্পনা হৈছে মনীষৰ বিৰুদ্ধে কেইবাটাও মিছা গোচৰ ৰুজু কৰা আৰু তেওঁক দীঘলীয়া সময়ৰ বাবে জিম্মাত ৰখা। এয়া দেশৰ বাবে দুখজনক!
ফেব্ৰুৱাৰীত কেন্দ্ৰীয় গৃহ মন্ত্ৰণালয়ে দুৰ্নীতি প্ৰতিৰোধ আইনৰ অধীনত ছিচোদিয়াৰ বিৰুদ্ধে গোচৰ চলাবলৈ আগবাঢ়ি গৈছিল। চিবিআইৰ এক প্ৰতিবেদনত অভিযোগ কৰা হৈছে যে ছিচোদিয়াই ফিডবেক ইউনিটক ৰাজনৈতিক হাথিয়াৰ হিচাপে ব্যৱহাৰ কৰি আছে৷ যদিও বিজেপিয়ে ছিচোদিয়া আৰু আপৰ বিৰুদ্ধে গোচৰ ৰুজু কৰিবলৈ আহ্বান জনাইছিল, তথাপি মুখ্যমন্ত্ৰী কেজৰিৱালে তেওঁলোকক ৰাজনৈতিক উদ্দেশ্যপ্ৰণোদিত বুলি অভিহিত কৰি অভিযোগসমূহ খণ্ডন কৰিছিল।
২০২১-২২ বৰ্ষৰ বাবে এতিয়া বাতিল কৰা দিল্লীৰ আবকাৰী নীতি প্ৰস্তুত আৰু ৰূপায়ণত দুৰ্নীতিৰ অভিযোগত দিল্লীৰ প্ৰাক্তন উপ-মুখ্যমন্ত্ৰী ছিচোদিয়াক চিবিআইয়ে ২৬ ফেব্ৰুৱাৰীত গ্ৰেপ্তাৰ কৰিছিল।
Continue Reading
