ডিজিটেল ডেস্কঃ এক ভয়ংকৰ দুৰ্ঘটনাই জোকাৰি গৈছে সমগ্ৰ দেশকে। ছিকিমত সংঘটিত শোকাৱহ পথ দুৰ্ঘটনাটোত ১৬ জন সেনা জোৱান নিহত হৈছে । দুৰ্ঘটনাটোত আহত হৈছে ৪ জন সেনা জোৱান। ভাৰতীয় সেনাই প্ৰকাশ কৰা মতে উত্তৰ ছিকিমৰ জেমাত সেনাৰ এখন ট্ৰাকে হঠাতে নিয়ন্ত্ৰণ হেৰুৱাই দ’ খাৱৈত পৰি যায়।
ফলত ১৬ জন জোৱানৰ থিতাতে মৃত্যু ঘটে। নিহত সেনা জোৱানসকলৰ পৰিচয় এতিয়াও সেনাই ঘোষণা কৰা নাই।জানিব পৰা মতে শুকুৰবাৰে পুৱা চাটেনৰ পৰা তিনিখন ট্ৰাকেৰে সেনাৰ কনভয় এটা থাংগুলৈ ৰাওনা হৈছিল। কিন্তু জেমা পোৱাৰ পিছতে হঠাতে এখন ট্ৰাক দুৰ্ঘটনাত পতিত হয়। ট্ৰাক খনে নিয়ন্ত্ৰণ হেৰুৱাই দ’ খাৱৈত বাগৰি পৰে।
দুৰ্ঘটনাটোৰ পিছতে উদ্ধাৰ অভিযান আৰম্ভ কৰা হয়। আঘাতপ্ৰাপ্ত সেনা জোৱানসকলক হেলিকপ্তাৰেৰে চিকিৎসালয়লৈ নিয়া হৈছে। বৰ্তমান চাৰিজন জোৱান চিকিৎসালয়ত চিকিৎসাধীন হৈ আছে। দুৰ্ঘটনাটোত ১৩ জন সৈনিক আৰু তিনিজন কনিষ্ঠ কমিছনড বিষয়া নিহত হৈছে।
প্ৰতিৰক্ষা মন্ত্ৰী ৰাজনাথ সিঙে ঘটনাটোত শোক প্ৰকাশ কৰি কয় "তেওঁলোকৰ সেৱাৰ বাবে দেশ গভীৰভাৱে কৃতজ্ঞ। মৃতকৰ পৰিয়াললৈ মোৰ সমবেদনা জনাইছো। মই আহতসকলৰ দ্ৰুত আৰোগ্যৰ বাবেও প্ৰাৰ্থনা জনাইছো। '
Continue Reading
