ডিজিটেল ডেস্কঃ বলীউডৰ ছুপাৰষ্টাৰ ছলমান খানৰ দৰে অনুৰাগী আন কাৰো নাই বুলি ক’লেও ভুল কোৱা নহ’ব। শেহতীয়াকৈ অভিনেতাগৰাকীয়ে ৫৭ সংখ্যক জন্মদিন উদযাপন কৰি সমগ্ৰ বিশ্বৰ অনুৰাগীৰ পৰা অপৰিসীম মৰম আৰু শুভেচ্ছা লাভ কৰে। ছলমান খানক বলিয়াৰ দৰে ভালপোৱা অলেখ অনুৰাগী আছে। আপুনি জানি আচৰিত হ’ব যে শেহতীয়াকৈ জব্বলপুৰৰ এজন অনুৰাগীয়ে চাইকেলেৰে ১১০০ কিলোমিটাৰ যাত্ৰা কৰি নিজৰ প্ৰিয় তাৰকা ছলমান খানক লগ কৰিবলৈ আহিল।
এই অনুৰাগীগৰাকীৰ নাম সমীৰ। সমীৰে নিজকে ছলমান খানৰ ‘ছলমান কে দীৱানে’ বুলি কয় আৰু তেওঁৰ চাইকেলখনত এখন বৰ্ড লগাইছিল, য’ত লিখা আছিল, ‘চলৌ উনকো দুৱায়ে দেতে চলে’। জব্বলপুৰৰ পৰা তেওঁ মুম্বাইলৈ চাইকেল চলাই আহে৷ ছলমান খানেও তেওঁৰ সৈতে থকা এখন ছবি ক্লিক কৰি অনুৰাগীৰ ইচ্ছা পূৰণ কৰে। এই ফটোখন এতিয়া ছ’চিয়েল মিডিয়াত ভাইৰেল হৈ পৰিছে।
এই ফটোত অনুৰাগীসকলে কমেণ্ট ছেকচন মৰমৰ মন্তব্যৰে উপচাই দিছে। এজন অনুৰাগীয়ে মন্তব্য কৰিছিল, ‘ভাই কি দীৱানগী’। আন এজন অনুৰাগীয়ে কয় যে বলীউডত ছলমান খানৰ আটাইতকৈ নিষ্ঠাবান আৰু উন্মাদ টাইপৰ অনুৰাগী আছে। একে সময়তে একাংশ লোকে এই ‘ছলমান কে দীৱানে’ক ১ নম্বৰৰ অনুৰাগীৰ টেগ দিছে।
Continue Reading
