ডিজিটেল ডেস্কঃ গুজৰাটৰ মহানগৰ আদালতে ৪১ বছৰৰ পাছত ৩ বছৰৰ কাৰাদণ্ড প্ৰদান কৰিছে এজন চিকিৎসকক। তথ্য অনুসৰি উক্ত চিকিৎসকজনে ভুৱা মাৰ্কশ্বীটৰ ভিত্তিত চিকিৎসা মহাবিদ্যালয়ত নামভৰ্তি কৰি বছৰ বছৰ ধৰি চিকিৎসা বিজ্ঞানৰ চৰ্চা অব্যাহত ৰাখিছিল, যাৰ বাবে এতিয়া আদালতে তেওঁক এই শাস্তি প্ৰদান কৰিছে। এই গোচৰটো ১৯৮০ চনৰ যেতিয়া উৎপল পেটেল নামৰ ব্যক্তিজনে আহমেদাবাদৰ চি.এন. স্কুলত দ্বাদশ শ্ৰেণীত বিজ্ঞান পঢ়ি আছিল। পৰীক্ষা দিয়াৰ পাছত ৰিজাল্টত ৪৮% নম্বৰ পালে যিটো মেডিকেল কলেজত নামভৰ্তি কৰিবলৈ উপযুক্ত নাছিল।
ইয়াৰ বাবেই উৎপল পেটেলে চাতুৰালিৰে এখন ভুৱা মাৰ্কশ্বীট বনাই য’ত তেওঁ নিজৰ নম্বৰ ৪৮%ৰ পৰিৱৰ্তে ৬৮% বুলি দেখুৱাই, যাৰ ভিত্তিত ব্যক্তিজনে মেডিকেল কলেজত নামভৰ্তি লাভ কৰিছিল। কিন্তু ইয়াৰ পাছত ১৯৮৪ চনত তেওঁৰ বিৰুদ্ধে আৰক্ষীয়ে এজাহাৰ দাখিল কৰে আৰু বহু বছৰ ধৰি আদালতত গোচৰটো চলি থাকে। গুজৰাটত তেওঁৰ বিৰুদ্ধে অভিযোগ উত্থাপন হ’লে গুজৰাটৰ পৰা ওলাই গৈ তামিলনাডুৰ এখন চিকিৎসা মহাবিদ্যালয়ত নামভৰ্তিৰ লগতে চিকিৎসকৰ কামো আৰম্ভ কৰে।উল্লেখ্য যে মাত্ৰ ১৭ বছৰ বয়সতে পেটেলৰ বিৰুদ্ধে এফআইআৰ দাখিল কৰা হৈছিল৷আৰু আজি তেওঁৰ বয়স ৬০ বছৰ যেতিয়া তেওঁক শাস্তি প্ৰদান কৰা হয়।
এই গোচৰত চৰকাৰী অধিবক্তাই কয় যে আদালতে সকলো অভিযোগ সত্য বুলি মানি লৈছে আৰু ভুৱা মাৰ্কশ্বীট বনাই মেডিকেলত ভৰ্তি হোৱাটোও সত্য বুলি প্ৰমাণিত হৈছে। চিকিৎসা বৃত্তিৰ সৈতে জড়িত ব্যক্তিৰ এনে কামে সমাজৰ আন লোকৰ ওপৰত বেয়া প্ৰভাৱ পেলায় বুলিও আদালতে ৰায় দিয়ে, যাৰ বাবে অভিযুক্তক কোনো ধৰণৰ সকাহ দিয়া উচিত নহয় বুলিও আদালতে মন্তব্য দিয়ে৷
Continue Reading
