ডিজিটেল ডেস্কঃ চিনেমা হলত বাহিৰৰ পৰা খাদ্য নিব পাৰিববনে দৰ্শকে? অৱশেষত এই প্ৰশ্নৰ উত্তৰ পোৱা গ’ল। এই সন্দৰ্ভত চিনেমা হল কৰ্তৃপক্ষৰ সিদ্ধান্তই শেষ কথা হিচাবে বিবেচিত হৈছে। চিনেমা হলত বাহিৰৰ পৰা খাদ্য নিব নোৱাৰিব বুলি উচ্চতম ন্যায়ালয়ে স্পষ্ট কৰি দিছে। এই ক্ষেত্ৰত চিনেমা হলৰ মালিকসকলৰ দাবীকেই অগ্ৰাধিকাৰ দিয়া হৈছে।
এখন ৰাজহুৱা স্বাৰ্থজড়িত আবেদনৰ শুনানি গ্ৰহণ কৰি উচ্চতম ন্যায়ালয়ৰ ন্যায়াধীশ চন্দ্ৰচূড়ৰ বিচাৰপীঠে কয় যে চিনেমা হলৰ মালিকসকলে তেওঁলোকৰ নিজৰ চৰ্ত অনুসৰি নিয়ম প্ৰস্তুত কৰিব পাৰে। যেতিয়ালৈকে ই ৰাজহুৱা স্বাৰ্থ, সুৰক্ষা আৰু কল্যাণৰ বিপৰীত নহয় তেতিয়ালৈকে ইয়াত মাত মতাৰ দৰকাৰ নাই। খাদ্য আৰু পানীয় বিক্ৰী কৰাৰ ক্ষেত্ৰত চিনেমা হলৰ মালিকে নিজৰ চৰ্ত ৰাখিব পাৰে। চিনেমা ইুভোগ কৰিবলৈ অহা দৰ্শকে চিনেমা হলতে বিক্ৰী কৰা খাদ্য ক্ৰয় কৰিব নে নকৰে সেয়া দৰ্শকসকলৰ ব্যক্তিগত বিষয় বুলিও বিচাৰপীঠে কয়।
উচ্চতম ন্যায়ালয়ে লগতে কয় যে যদিও খাদ্যৰ ওপৰত নিষেধাজ্ঞা আছে, ইয়াক নিশ্চিত কৰিব লাগিব যে চিনেমা হলবোৰত বিনামূলীয়াকৈ বিশুদ্ধ খোৱা পানীৰ সুবিধা ৰখা হয়।উল্লেখ্য চিনেমা হলৰ টিকটৰ মূল্য ইতিমধ্যে বৃদ্ধি পাইছে। তাত বিক্ৰী কৰা কফি , পপকৰ্ন আদিৰ মূল্যও বাহিৰতকৈ বহু বেছি। সেয়ে বহু দৰ্শকে ইবিষয়টোকলৈ অসন্তুষ্টি প্ৰকাশ কৰিছিল। এই সন্দৰ্ভত বহু ৰাজহুৱা স্বাৰ্থৰ আবেদনো দাখিল কৰা হৈছিল। উচ্চতম ন্যায়ালয়ে সেই ৰাজহুৱা স্বাৰ্থৰ আবেদনৰ শুনানি গ্ৰহণ কৰিয়েই ৰায় দিয়ে। অৱশ্যে এই ৰায়ে চিনেমা হলৰ মালিকসকলকহে উপকৃত কৰিব বুলি বহুতে মন্তব্য কৰিছে।
Continue Reading
