ডিজিটেল ডেস্কঃ কংগ্ৰেছৰ সাংসদ তথা প্ৰাক্তন কেন্দ্ৰীয় মন্ত্ৰী পি চিদাম্বৰমে পুনৰ মুদ্ৰাস্ফীতি, মূল্যবৃদ্ধি আৰু নিবনুৱা সমস্যা সন্দৰ্ভত কেন্দ্ৰৰ বিজেপি চৰকাৰক আক্ৰমণ কৰে। শনিবাৰে (৩০ ছেপ্টেম্বৰ) ৰামেশ্বৰমত এখন ৰাজহুৱা সভাত ভাষণ দি তেওঁ কয় যে কেন্দ্ৰৰ বিজেপি চৰকাৰ বিভ্ৰান্ত। এইখন চৰকাৰৰ পৰা বিদায় লোৱাৰ সময় আহি পৰিছে। তামিলনাডুৰ ৰামেশ্বৰমত অনুষ্ঠিত নিখিল ভাৰত মাছমৰীয়া কংগ্ৰেছৰ বৈঠকত তেওঁ এইদৰে কয়।
পি চিদাম্বৰমে কয় যে, “মুদ্ৰাস্ফীতি, মূল্য নিয়ন্ত্ৰণ কৰিব নোৱাৰা আৰু চাকৰি দিব নোৱাৰা অকাৰ্যকৰী বিজেপি চৰকাৰক বিদায় দিয়ক। তেওঁ কয়, ভাৰতীয় অৰ্থনীতি দ্ৰুতগতিত বৃদ্ধি হোৱা নাই। যি অৰ্থনীতিয়ে দাম নিয়ন্ত্ৰণ নকৰে আৰু কৰ্মসংস্থাপনৰ সৃষ্টি নকৰে, সেই অৰ্থনীতিক উন্নত অৰ্থনীতি বুলি গণ্য কৰিব নোৱাৰি। মোৰ মতামত যে ১০ বছৰত এবাৰ চৰকাৰ সলনি কৰিব লাগে। লাগিনে সেয়া কংগ্ৰেছ দলৰ চৰকাৰই নহওক।
মুদ্ৰাস্ফীতিৰ বিষয়ত প্ৰাক্তন কেন্দ্ৰীয় বিত্তমন্ত্ৰীগৰাকীয়ে কয় যে মুদ্ৰাস্ফীতি ৬ শতাংশৰ ওপৰত উপনীত হৈছে যিটো ৪ শতাংশৰ ওপৰত হ’ব নালাগে। তেওঁ কয়, ‘বিজেপিৰ শাসনৰ ৯ বছৰত যুৱক-যুৱতীসকলৰ নিবনুৱা সমস্যা হ্ৰাস হোৱা নাই। অৰ্থনীতিবিদসকলৰ মতে অৰ্থনৈতিক বিকাশৰ অৰ্থ হ’ল মূল্য নিয়ন্ত্ৰণ কৰা, কৰ্মসংস্থাপন বৃদ্ধি কৰা, ঘৰুৱা সঞ্চয় বৃদ্ধি কৰা, ঋণ হ্ৰাস কৰা আৰু মুদ্ৰাস্ফীতি নিয়ন্ত্ৰণত ৰখা।’
পি চিদাম্বৰমে আৰু কয়, “যোৱা বছৰ যেতিয়া ভাৰতৰ জনসাধাৰণৰ ঐক্য আৰু ভাতৃত্ববোধৰ ওপৰত গুৰুত্ব আৰোপ কৰিবলৈ কন্যাকুমাৰীৰ পৰা কাশ্মীৰলৈ এখন পদযাত্ৰা উলিয়াই অনা হৈছিল, তেতিয়া এজন ৫১ বছৰীয়া যুৱকে (ৰাহুল গান্ধী) ৪০০০ কিলোমিটাৰ খোজ কাঢ়িছিল।একবিংশ শতিকাত এই কৃতিত্ব অৰ্জন কৰিছে কেৱল ৰাহুল গান্ধীয়ে।”
তদুপৰি আৰ এছ এছৰ মুৰব্বী মোহন ভাগৱতকো লক্ষ্য কৰি হিন্দু আৰু মুছলমানৰ মাজত বিসংগতি সৃষ্টি কৰাটোৱেই নির্বাচনত জয়ী হোৱাৰ পথ বুলি চিদাম্বৰমে অভিযোগ উত্থাপন কৰে৷
Continue Reading
