চৰকাৰী গিনিপিগ সজাইছে শিক্ষকসকলকঃ সাংসদ ৰিপুন বৰা

ডিজিটেল ডেস্ক: ‘সমাজৰ মেৰুদণ্ড স্বৰূপ শিক্ষকক চৰকাৰী গিনিপিক সজাইছে…’- এই মন্তব্য ৰাজ্যসভাৰ সাংসদ ৰিপুন বৰাৰ৷ তেওঁৰ মতে, শিক্ষকসকলৰ ওপৰত অন্যায় কৰা হৈছে৷ আজি ৰাজীৱ ভৱনত এক সংবাদমেল অনুষ্ঠিত কৰি চৰকাৰৰ বিৰুদ্ধে বিভিন্ন বিস্ফোৰক অভিযোগ উত্থাপন কৰে সাংসদগৰাকীয়ে৷

তেওঁৰ মতে, শিক্ষকসকলক চৰকাৰে গিনিপিক সজাইছে৷ শিক্ষকসকলক অন্যায় কৰা হৈছে৷ উল্লেখ্য চৰকাৰে উন্মোচন কৰিছিল ‘ৰিমছ এপ’৷ এই এপটোৱে শিক্ষকৰ মৰ্যাদা হানি কৰিছে বুলিও অভিহিত কৰে তেওঁ৷ ‘ৰিমছ এপ’ৰ দৰে ডিজিটেল ব্যৱস্থাৰ জৰিয়তে প্ৰধান শিক্ষকৰ পদমৰ্যাদাত আঘাত হনা হৈছে বুলিও অভিযোগ উত্থাপন কৰে সাংসদগৰাকীয়ে৷ ৰিপুন বৰাৰ মতে, ‘শিক্ষকসকলক মানসিক চাপ দিয়া হৈছে৷ ৰিমছ এপে শিক্ষকসকলৰ গোপনীয়তা ভংগ কৰিব৷’

আনহাতে, এটা ব্যক্তিগত কোম্পানীক লাভান্বিত কৰিবৰ বাবে চৰকাৰে এই ব্যৱস্থা কৰিছে বুলিও মন্তব্য কৰে তেওঁ৷ ৰিপুন বৰাৰ দাবী বিষয়টোৰ সন্দৰ্ভত চৰকাৰে শ্বেতপত্ৰ দিয়ক৷ আনহাতে, টেট পৰীক্ষাৰ বিসংগতিৰ ওপৰতো মন্তব্য কৰে সাংসদগৰাকীয়ে৷ সাংসদগৰাকীৰ মতে, টেট পৰীক্ষাৰ পুনৰীক্ষণ কৰিব লাগে৷