ডিজিটেল ডেস্কঃ এটা তেজাল কুকুৰা৷ দেখি জিভাৰ পৰা টোপা-টোপে পানী পৰিছিল চোৰৰ৷ সেয়ে হাতত সাৰে ভৰিত সাৰে চোৰ কাষ চাপিল কুকুৰাৰ৷ কুকুৰাটো ধৰিবলৈ চোৰে কুকুৰাটো ৰখা ডাঙৰ পিঞ্জৰাটোৰ ভিতৰত সোমাল৷ কিন্তু পিঞ্জৰাটোত সোমোৱাৰ লগে লগে খটকৈ শব্দ কৰি পিঞ্জৰাৰ দুৱাৰ বন্ধ হৈ গ’ল৷ বহু চেষ্টা কৰিও চোৰে পিঞ্জৰাটোৰ দুৱাৰ খন খুলিবলৈ সক্ষম নহ’ল৷
তেতিয়াহে যেন চোৰে বুজি পালে ঘটনাৰ ৰহস্য কি৷ দৰাচলতে যি স্থানলৈ চোৰে কুকুৰা চুৰি কৰিবলৈ গৈছিল সেই স্থানত যোৱা কিছুদিন ধৰি এটা নাহৰফুটুকী বাঘে ত্ৰাসৰ সৃষ্টি কৰি আহিছিল৷ বাঘটোক ধৰিবলৈয়েই গাঁওবাসীৰ অনুৰোধত স্থানীয় বনবিভাগৰ কৰ্মীয়ে এটা পিঞ্জৰা স্থাপন কৰিছিল৷
পিঞ্জৰাটোত বাঘক প্ৰলোভিত কৰিবলৈ এটা তেজাল কুকুৰা ৰাখি থোৱা হৈছিল৷ চোৰে এই কথাবোৰ আগতে জনা নাছিল৷ সেয়ে কুকুৰাৰ লোভ সামৰিব নোৱাৰি পোনে পোনে পিঞ্জৰাত সোমাই যায় আৰু আবদ্ধ হৈ পৰে৷ ঘটনাটো ঘটিছে উত্তৰ প্ৰদেশৰ বুলন্দ চহৰৰ এখন ভিতৰুৱা গাঁৱত ৷
আচল কথা ধৰিব পাৰি চোৰে ৰাইজক পিঞ্জৰাটোৰ পৰা তেওঁক মুকলি কৰি দিবলৈ কাকুতি-মিনতি কৰিবলৈ ধৰে৷ ঘটনাটোৰ এক ভিডিঅ’ ইতিমধ্যে ছ’চিয়েল মিডিয়াত ভাইৰেল হৈ পৰিছে৷ ঘটনাটোৱে মানুহৰ মাজত হাঁহিৰ ৰোল তোলা পৰিলক্ষিত হৈছে৷ যিকিনহওঁক, গাওঁবাসীয়ে বাঘ ধৰিব নোৱাৰিলেও পিঞ্জৰাত এটা চোৰ ধৰিব পাৰি আনন্দিত হৈ পৰিছে৷
Continue Reading
