ডিজিটেল ডেস্কঃ পোহনীয়া কোনো প্ৰাণীৰ মৃত্যু হ'লে মানুহে অন্তৰত বহুত দুখ পায়। এয়া এনে এক নিবিড় বান্ধোন যে যিয়ে হেৰুৱাই সিহে অনুভৱ কৰিব পাৰে। এটা দুৰ্ভাগ্যজনক খবৰ পোহৰলৈ আহিছে। ঘৰৰ একুৰিয়ামৰ পোহনীয়া মাছৰ মৃত্যু হোৱাত এটি ল'ৰা ইমানেই দুখী হ'ল যে তেওঁ নিজৰ জীৱনেই শেষ কৰি দিলে। এই ঘটনা সংঘটিত হৈছে কেৰালাৰ মানাপ্পুৰামৰ চাংগাৰামকুলামত।
নিজৰ একুৰিয়ামৰ পোহনীয়া মাছৰ মৃত্যুৰ দুখ সহ্য কৰিব নোৱাৰি নিজৰেই জীৱন শেষ কৰি দিলে ১৩ বছৰীয়া ৰোশন মেনন নামৰ কিশোৰগৰাকীয়ে। নিজৰ ঘৰৰ চাদত চীপ লোৱা অৱস্থাত উদ্ধাৰ হয় ৰোশনৰ মৃতদেহ।
ঘটনাটো সংঘটিত হোৱাৰ দিনা ৰোশনে ঘৰৰ চাদত কপৌক চাউল খুৱাই আছিল। এঘণ্টা পাৰ হৈ যোৱাৰ পাছতো ৰোশন তললৈ নামি নহাত পৰিয়ালৰ লোকে চাদৰ ওপৰলৈ বিচাৰি যায় আৰু ৰোশনক প্লাষ্টিকৰ ৰছীত ওলমি থকা অৱস্থাত উদ্ধাৰ কৰে। লগে লগে পৰিয়ালৰ লোকে ৰোশনক স্থানীয় চিকিৎসালয়ত ভৰ্তি কৰায় যদিও ৰোশনক মৃত ঘোষণা কৰে চিকিৎসকে।
ৰোশনে জীৱ-জন্তুক বহু মৰম কৰিছিল আৰু ঘৰতে এটা একুৰিয়াম ৰাখি মাছ পুহিছিল। কিছুদিন আগতে তেওঁৰ একুৰিয়ামৰ মাছ মৰি গৈছিল আৰু তেতিয়াৰ পৰাই ল’ৰাটো হতাশ হৈ পৰিছিল আৰু মন মাৰি আছিল। উল্লেখ্য যে মুকুথালা চৰকাৰী উচ্চতৰ মাধ্যমিক বিদ্যালয়ৰ অষ্টম শ্ৰেণীৰ ছাত্ৰ আছিল ৰোশন মেনন।
Continue Reading
