ডিজিটেল ডেস্কঃ পাকিস্তান ক্ৰিকেট দলৰ প্ৰাক্তন অধিনায়ক মহম্মদ হাফিজৰ লাহোৰস্থিত ঘৰত চুৰি হৈছে। হেৰুৱালে প্ৰায় ভাৰতীয় মূল্যত ১৬ লাখ টকাৰ বিদেশী মুদ্ৰা।
বুধবাৰে বিষয়টো হাফিজৰ এজন আত্মীয়ৰ দৃষ্টিগোচৰ হয়। আৰক্ষীয়ে তদন্ত আৰম্ভ কৰিছে। প্ৰথমে দেওবাৰৰ পৰা সোমবাৰৰ ভিতৰত এই চুৰিৰ ঘটনা সংঘটিত হোৱা বুলি অনুমান কৰা হৈছে।
কিছুদিন ঘৰত নাছিল হাফিজ আৰু তেওঁৰ পত্নী। এতিয়া তেওঁ পাকিস্তান ছুপাৰ লীগত কুৱেটা গ্লেডিয়েটৰছৰ হৈ খেলে। তাৰ বাবে তেওঁ ইছলামবাগত পৰিয়ালৰ সৈতে আছে। চোৰে সেই সুযোগেই ব্যৱহাৰ কৰিছিল।
ঘৰটোৰ চিচিটিভি ফুটেজত কোনো দুষ্কৃতিকাৰীক দেখা পোৱা নাই। খবৰ অনুসৰি ঘৰৰ এটা অংশ ভাঙি ভিতৰলৈ সোমাইছিল চোৰ। বুধবাৰে এই বিষয়টো হাফিজৰ ককাক আৰু শহুৰেক শ্বাহিদ ইকবালৰ দৃষ্টিগোচৰ হয়। তেওঁলোকে আৰক্ষীক লিখিত এজাহাৰ দাখিল কৰে।
প্ৰথম অৱস্থাত হাফিজৰ ঘৰৰ পৰা ২০ হাজাৰ ডলাৰ, ৪ হাজাৰ পাউণ্ড, ৩ হাজাৰ ইউৰো আৰু ৫ হাজাৰ আৰব ডলাৰ হেৰায়। তদন্তকাৰীয়ে আৰু কি নোহোৱা হৈছে তাৰ সন্ধান কৰিছে। দেশৰ এগৰাকী শীৰ্ষস্থানীয় ক্ৰিকেটাৰৰ ঘৰত চুৰি হোৱাত বহু লোক আচৰিত হৈছে।
যোৱা ৩ জানুৱাৰীত আন্তঃৰাষ্ট্ৰীয় ক্ৰিকেটৰ পৰা অৱসৰ গ্ৰহণ কৰিছিল হাফিজে। ২০১৮ চনত তেওঁ টেষ্ট ক্ৰিকেটৰ পৰা অৱসৰ গ্ৰহণ কৰিছিল। ২০১৯ চনৰ বিশ্বকাপৰ অন্তিমখন এদিনীয়া আন্তঃৰাষ্ট্ৰীয় মেচ খেলিছিল। কেইবাদিনো ৰাষ্ট্ৰীয় দলৰ পৰা আঁতৰি থকাৰ পিছত ২০২০ চনত পুনৰ টি-২০ দললৈ উভতি আহে হাফিজে। সেই বছৰ টি-২০ ক্ৰিকেটত তেওঁ আছিল বিশ্বৰ সৰ্বাধিক ৰান সংগ্ৰহকাৰী।
পাকিস্তানৰ হৈ ৫৫খন টেষ্ট, ২১৮খন এদিনীয়া আৰু ১১৯খন টি-২০ মেচ খেলিছে হাফিজে। আন্তঃৰাষ্ট্ৰীয় ক্ৰিকেটত তেওঁৰ প্ৰায় ১৩ হাজাৰ ৰান আছে। পাকিস্তানৰ প্ৰাক্তন অধিনায়কগৰাকীয়ে টেষ্টত ১০ শতক আৰু এদিনীয়াত ১১টা শতক ৰান সংগ্ৰহ কৰিছে।
Continue Reading
