ডিজিটেল ডেস্ক: চেনিৰ আঁৰত বৃহৎ পৰিমাণৰ কফ ছিৰাপ সৰবৰাহৰ চেষ্টা বিফল কৰিলে কাছাৰৰ বৰখলা আৰক্ষীয়ে। বালাছড়া টোলগেটত অভিযান চলাই এখন ট্ৰাকৰ পৰা ৪৭ হাজাৰ বটল কফ জব্দ উদ্ধাৰ কৰা হৈছে। জব্দ হোৱা ছিৰাপখিনিৰ আনুমানিক বজাৰ মূল্য ১ কোটি ২৬ লাখ ৯০ হাজাৰ টকা। ঘটনাৰ সৈতে জড়িত ট্ৰাকখনৰ চালক আৰু সহচালকক আটক কৰিছে আৰক্ষীয়ে।
জানিব পৰা মতে, MP 33 H 2083 নম্বৰৰ ট্ৰাকখন উত্তৰ প্ৰদেশৰ কানপুৰৰ পৰা ত্ৰিপুৰালৈ গৈ আছিল। গোপন সূত্ৰৰ খবৰৰ ভিত্তিত যোৱা নিশা বালাছড়া টোলগেটত ট্ৰাকখন ৰখাই তালাচী চলায় আৰক্ষীয়ে। চেনিভৰ্তি ট্ৰাকখনৰ ভিতৰত ৪৭০টা কাৰ্টনত মুঠ ৪৭ হাজাৰ বটল কফ ছিৰাপ মজুত আছিল বুলি জানিব পৰা গৈছে।
বৰখলা থানাৰ অ’চি কুলেন্দ্ৰ কুমাৰ হুজুৰিৰ নেতৃত্বত এই অভিযান চলোৱা হয়। আটকাধীন দুয়োকে থানালৈ লৈ গৈ জেৰা অব্যাহত ৰাখিছে আৰক্ষীয়ে। এই সৰবৰাহৰ সৈতে কোনো সংগঠিত চক্ৰ জড়িত আছে নেকি, ছিৰাপখিনি ক’ৰ পৰা অনা হৈছিল আৰু ইয়াৰ গন্তব্যস্থান ক’ত আছিল, সেই সন্দৰ্ভত তদন্ত অব্যাহত ৰাখিছে আৰক্ষীয়ে।
Continue Reading
