ডিজিটেল ডেস্ক: অসমীয়া জলপানৰ অন্যতম সোৱাদযুক্ত আৰু পৰম্পৰাগত উপাদান হ’ল ‘বৰা চাউল’। এই আঠাযুক্ত (sticky) চাউলবিধ কেৱল খোৱাৰ সোৱাদৰ বাবেই নহয়, ইয়াৰ পুষ্টিগত আৰু ঔষধি গুণৰ বাবেও অতি জনপ্ৰিয়। পুৱাৰ জলপানত বৰা চাউল খালে শৰীৰে দীৰ্ঘসময়ৰ বাবে শক্তি লাভ কৰে। বৰা চাউলৰ জলপান শৰীৰৰ বাবে অত্যন্ত উপকাৰী আৰু ই এক উৎকৃষ্ট শক্তিৰ উৎস। অসমীয়া সংস্কৃতিৰ বাপতিসাহোন বিহু আৰু অতিথি আপ্যায়নৰ এক অপৰিহাৰ্য অংগ হৈছে বৰা চাউলৰ জলপান। দৈ, গাখীৰ, গুৰ, ক্ৰীমৰ সৈতে খোৱা এই পৰম্পৰাগত আহাৰবিধৰ প্ৰধান স্বাস্থ্যজনিত উপকাৰিতাসমূহ তলত উল্লেখ কৰা হ’ল।
বৰা চাউল জলপানৰ মুখ্য স্বাস্থ্য উপকাৰিতা
১. শক্তিৰ উৎস: বৰা চাউলত কাৰ্ব’হাইড্ৰেটৰ পৰিমাণ প্ৰচুৰ মাত্ৰাত থাকে। পুৱাৰ জলপানত বৰা চাউল খালে ই শৰীৰক দ্ৰুত আৰু দীঘলীয়া সময়ৰ বাবে প্ৰয়োজনীয় শক্তি যোগায়। বিশেষকৈ শাৰীৰিক পৰিশ্ৰম কৰা লোকসকলৰ বাবে ই এক আদৰ্শ খাদ্য।
২. পাচনক্ৰিয়াত সহায়ক: বৰা চাউল সাধাৰণতে সহজে হজম হয়। ই পেটৰ বিভিন্ন সমস্যা যেনে গেছ, এচিডিটি আদি নিয়ন্ত্ৰণ কৰাত সহায় কৰে। ইয়াৰ আঠাযুক্ত গুণটোৱে পাকস্থলীৰ আৱৰণক শান্ত ৰখাত অৱদান যোগায়।
৩. কম চৰ্বিযুক্ত: এই চাউলত চৰ্বিৰ পৰিমাণ অতি কম, যাৰ ফলত ই হৃদযন্ত্ৰৰ স্বাস্থ্যৰ বাবে উপযোগী।
৪. প্ৰয়োজনীয় খনিজ পদাৰ্থৰ উপস্থিতি: বৰা চাউলত আইৰণ, কেলচিয়াম আৰু মেগনেছিয়ামৰ দৰে প্ৰয়োজনীয় খনিজ পদাৰ্থ থাকে, যিবোৰে শৰীৰৰ হাড়ৰ গঠন মজবুত কৰা আৰু ৰক্তহীনতা প্ৰতিৰোধ কৰাত গুত্বপূর্ণ ভূমিকা পালন কৰে।
৫. শৰীৰৰ ওজন নিয়ন্ত্ৰণত সহায়ক: বৰা চাউল খোৱাৰ পিছত পেটটো দীৰ্ঘ সময়লৈ ভৰি থাকে, যাৰ ফলত বাৰে বাৰে খাদ্য খোৱাৰ প্ৰৱণতা হ্ৰাস পায়। ই স্বাস্থ্যসন্মতভাৱে ওজন নিয়ন্ত্ৰণ কৰাত পৰোক্ষভাৱে সহায় কৰে।
৬. ৰোগ প্ৰতিৰোধ ক্ষমতা বৃদ্ধি: পৰম্পৰাগত বৰা চাউলত থকা এণ্টি-অক্সিডেণ্ট আৰু মাইক্ৰ'-নিউট্ৰিয়েণ্টে শৰীৰৰ ৰোগ প্ৰতিৰোধ ক্ষমতা শক্তিশালী কৰাত সহায় কৰে।
৭. গ্লুটেন মুক্ত: যিহেতু বৰা চাউল প্ৰাকৃতিকভাৱে গ্লুটেন-মুক্ত, সেয়েহে গ্লুটেনৰ প্ৰতি সংবেদনশীলতা (Gluten Intolerance) থকা বা চেলিয়াক ৰোগত আক্ৰান্ত লোকসকলৰ বাবে ই এক নিৰাপদ আৰু স্বাস্থ্যকৰ বিকল্প।
অসমীয়া সংস্কৃতি আৰু পৰম্পৰাৰ লগত ওতপ্রোতভাৱে জড়িত বৰা চাউলৰ জলপান কেৱল সোৱাদেই নহয়, স্বাস্থ্যৰ দিশৰ পৰাও অত্যন্ত উপকাৰী। আমাৰ পুৰণি পৰম্পৰাগত খাদ্যভ্যাসলৈ ঘূৰি গৈ আমি স্বাস্থ্যৱান জীৱনশৈলী গঢ়ি তুলিব পাৰোঁ।
সাৱধানতা: বৰা চাউলত থকা এমিড'পেকটিনৰ বাবে ইয়াৰ গ্লাইচেমিক ইনডেক্স কিছু বেছি হ'ব পাৰে। সেইবাবে ডায়েবেটিছ ৰোগীসকলে ইয়াক খোৱাৰ সময়ত পৰিমাণ সীমিত কৰা উচিত আৰু চেনিৰ সলনি প্ৰাকৃতিক গুৰ বা দৈৰ সৈতে জুখি-মাখি খোৱা ভাল।
Continue Reading
