চতুৰ্থ বাৰ্ষিক সদৌ অসম শশাঙ্ক দাস কলিতা সোঁৱৰণী 'ৰূপালীম একাঙ্কিকা নাট প্ৰতিযোগিতা'ৰ পাণ্ডুলিপি প্ৰেৰণৰ সময়সীমা ১২ জানুৱাৰীলৈ বৃদ্ধি

উল্লেখ্য যে অহা ২০২৩ বৰ্ষৰ জানুৱাৰী মাহৰ আঠাইছ  আৰু ঊনত্ৰিছ তাৰিখে দুদিনীয়া কাৰ্যসূচীৰে শুৱালকুছিৰ সমীপৰ হালোগাৱত আয়োজন কৰা এই একাঙ্কিকা নাট প্ৰতিযোগিতাখনিত যোগদানৰ বাবে অসমৰ ভিন্ন প্ৰান্তৰ নাট্য দল সমূহৰ পৰা পান্ডুলিপি আহ্বান কৰা হৈছে।

 পাণ্ডুলিপি জমা দিয়াৰ অন্তিম তিথি অহা ১২ জানুৱাৰীলৈ বৃদ্ধি কৰা হৈছে বুলি উদ্যোক্তা সকলে জানিবলৈ দিছে। এইবাৰৰ ৰূপালীমৰ বিভিন্ন পুৰস্কাৰৰ শিতানত প্ৰথম শ্ৰেষ্ঠ নাট‍্যদল, দ্বিতীয় শ্ৰেষ্ঠ নাট‍্যদল আৰু তৃতীয় শ্ৰেষ্ঠ নাট‍্যদলৰ বাবে যথাক্ৰমে বিশ হাজাৰ, পোন্ধৰ হাজাৰ আৰু দহ হাজাৰ নগদ ধনৰ লগতে স্মাৰক আৰু মানপত্ৰ প্ৰদান কৰা হ'ব। তেনেদৰে শ্ৰেষ্ঠ পান্ডুলিপিৰ বাবে পাঁচ হাজাৰ, শ্ৰেষ্ঠ পৰিচালকৰ বাবে পাঁচ হাজাৰ, শ্ৰেষ্ঠ অভিনেতা আৰু অভিনেত্ৰীৰ বাবে পাঁচ হাজাৰকৈ, শ্ৰেষ্ঠ সহ-অভিনেতা আৰু শ্ৰেষ্ঠ সহ-অভিনেত্ৰীৰ বাবে তিনি হাজাৰকৈ, শ্ৰেষ্ঠ শিশু শিল্পীৰ বাবে তিনি হাজাৰ নগদ ধনৰ লগতে মানপত্ৰ আৰু স্মাৰক প্ৰদানৰ সিদ্ধান্ত ঘোষণা কৰা হৈছে। লগতে জুৰিৰ বিশেষ উল্লেখ হিচাপে মানপত্ৰ আৰু স্মাৰক প্ৰদানৰ ব‍্যৱস্থা ৰখা হৈছে। 

আনহাতে প্ৰতিযোগিতাখনিলৈ অসমৰ বিভিন্ন প্ৰান্তৰ পৰা অংশগ্ৰহণ কৰিবলৈ অহা প্ৰতিটো নাট‍্যদলক যিকোনো এটা পুৰস্কাৰ লাভ নকৰিলে যাতায়াতৰ বাবদ তিনি হাজাৰকৈ নগদ ধন আৰু অংশগ্ৰহণৰ প্ৰমাণপত্ৰ প্ৰদান কৰাৰ  কথা কোৱা হৈছে। প্ৰতিযোগিতাত অংশগ্ৰহণ কৰিবলৈ ইচ্ছুক নাট‍্যদল সমূহক তেখেতসকলৰ নাটকৰ ডিটিপি কৰা পান্ডুলিপি পিডিএফ ফৰমেটত অহা ১২ জানুৱাৰী ২০২৩ ৰ ভিতৰত  www.rupalim.org ত  প্ৰবেশ কৰি নিৰ্দিষ্টকৈ থকা লিংক (https://forms.gle/BFoSezDiebKP877c8) ত আপলোড কৰিবলৈ অথবা ৰূপালীম একাঙ্কিকা নাট প্ৰতিযোগিতা, মাৰফৎ হিৰণ্য ভট্টাচাৰ্য্য, দ্বিতীয় মহলা, ঘৰ নং ২৪৭ (শ্ৰীমন্ত শঙ্কৰদেৱ নামঘৰ আৰু কৃষ্টি বিকাশ কেন্দ্ৰৰ সমীপত), হেঙেৰাবাৰী পথ, গণেশগুৰী, গুৱাহাটী - ৭৮১০০৬ (যোগাযোগৰ বাবে মোবাইল নম্বৰ +918876515128 / +919706263192) ঠিকনালৈ পঠিয়াবৰ বাবে আহ্বান জনোৱা হৈছে। পান্ডুলিপিৰ বেটুপাতত স্পষ্টকৈ নাটকৰ নাম, নাট্যদলৰ নাম, পৰিচালকৰ নাম, নাটকৰ দৈৰ্ঘ্য, যোগাযোগৰ ঠিকনা, ইমেইল আৰু মোবাইল নম্বৰ আদি উল্লেখ থাকিব লাগিব। 

নাটকৰ দৈৰ্ঘ্য মঞ্চ সজ্জা সহিতে পঞ্চলিশ মিনিট ধাৰ্য কৰা হৈছে। প্ৰতিটো নাট্যদলে ভৰ্তি মাচুল হিচাপে পাঁচশ টকা প্ৰতিযোগিতা থলীত উপস্থিত হোৱাৰ পিছত কাৰ্যালয়ত জমা দিব লাগিব। অসমৰ লব্ধ প্ৰতিষ্ঠিত নাট্য কৰ্মীৰ দ্বাৰা বিচাৰকৰ আসন অলংকৃত হ'বলগা দুহেজাৰ তেইশ বৰ্ষৰ ৰূপালীমৰ বঁটা সমূহ প্ৰদান কৰা হ'ব ঊনত্ৰিছ জানুৱাৰীৰ নিশা। বঁটা বিতৰণী অনুষ্ঠানত অসমৰ বহু গৰাকী জনপ্ৰিয় তাৰকা নাট্য শিল্পী উপস্থিত থাকিব  বুলি আয়োজক সকলে জানিবলৈ দিছে। বিষদ তথ্যৰ বাবে 9101301929 আৰু 7002389344 নম্বৰতো যোগাযোগ কৰিব পাৰিব।।