ডিজিটেল ডেস্কঃ মোদী উপাধি বিতৰ্কৰ গোচৰত চুৰাটৰ সত্ৰ ন্যায়াধীশৰ আদালতে ৰাহুল গান্ধীক দুবছৰৰ কাৰাদণ্ড বিহা ৰায়ৰ বিৰুদ্ধে ৰাহুলে গুজৰাট উচ্চ ন্যায়ালয়ত জনোৱা আবেদনৰ শুনানি আৰম্ভ হৈছে। ন্যায়াধীশ হেমন্ত প্ৰচণ্ডৰ বিচাৰপীঠে শনিবাৰে পুৱা বিষয়টোৰ শুনানি গ্ৰহণৰ প্ৰক্ৰিয়া আৰম্ভ কৰে।
উল্লেখ্য মঙলবাৰে ৰাহুল গান্ধীৰ অধিবক্তা বি.এম. মংগুকিয়াই শাস্তি কাৰ্যকৰী কৰাৰ বাবে চুৰাট সত্ৰ আদালতে দিয়া নিৰ্দেশৰ ওপৰত স্থগিতাদেশ বিচাৰি উচ্চ ন্যায়ালয়ত আবেদন জনাইছিল। আবেদনখন ন্যায়াধীশ গীতা গোপীৰ নেতৃত্বত গঠিত এখন বিচাৰপীঠত ত শুনানিৰ বাবে তালিকাভুক্ত কৰা হৈছিল। কিন্তু বুধবাৰে গুজৰাট উচ্চ ন্যায়ালয়ৰ ন্যায়াধীশ গোপীয়ে গোচৰটোৰ শুনানিৰ পৰা নিজকে আঁতৰাই ৰাখিছিল। যেতিয়া ৰাহুলৰ অধিবক্তা পি এছ চম্পানেৰীয়ে আবেদনখনৰ আগতীয়া শুনানি অনুষ্ঠিত কৰিব বিচাৰি আবেদন কৰাত ন্যায়াধীশ গোপীয়ে কৈছিল, " এয়া মোৰ দ্বাৰা নহয়।’’
তেওঁ উচ্চ ন্যায়ালয়ৰ পঞ্জীয়কক গোচৰটো মুখ্য ন্যায়াধীশলৈ পঠিয়াবলৈ নিৰ্দেশ দিছিল। ইয়াৰ পিছতে গোচৰটো ন্যায়াধীশ হেমন্তৰ নেতৃত্বত গঠিত এখন বিচাৰপীঠলৈ গৈছিল। ২৩ মাৰ্চত গুজৰাটৰ চুৰাট দণ্ডাধীশৰ আদালতৰ ন্যায়াধীশ এইচ এইচ বাৰ্মাই ২০১৯ চনৰ লোকসভা নিৰ্বাচনৰ প্ৰচাৰৰ সময়ত কৰ্ণাটকৰ কোলাৰত 'মোদী' উপাধি ব্যৱহাৰ কৰি আপত্তিজনক মন্তব্য কৰাৰ বাবে ৰাহুলক দুবছৰৰ কাৰাদণ্ড বিহিছিল।
ন্যায়াধীশে অৱশ্যে "অপৰাধমূলক মানহানি" গোচৰত ৰাহুলৰ জামিন আবেদনৰ অনুমতি দিছিল আৰু উচ্চতৰ আদালতত ৰায়ৰ বিৰুদ্ধে আপীল কৰিবলৈ তেওঁক ৩০ দিন সময় দিছিল।
২৪ মাৰ্চত লোকসভাৰ অধ্যক্ষ ওম বিৰলাই ভাৰতীয় সংবিধানৰ অনুচ্ছেদ ১০২(১)- আৰু চুৰাট দণ্ডাধীশৰ আদালতৰ ৰায়ৰ ওপৰত ভিত্তি কৰি জনপ্ৰতিনিধিত্ব আইনৰ (১৯৫১) অনুচ্ছেদ ৮(৩)ৰ অধীনত ৰাহুলৰ সংসদৰ সদস্যপদ খাৰিজ কৰিছিল।
Continue Reading
