ডিজিটেল ডেস্কঃ এগৰাকী কইনাৰ এক সিদ্ধান্ত এতিয়া চৰ্চাৰ বিষয় হৈ পৰিছে। সাত ফেৰে লোৱাৰ পাছত কইনাই ভাঙিলে বিয়া। দৰাৰ এক কাণ্ডই কইনাক ইমানেই ক্ষুব্ধ কৰি তুলিছিল যে তেওঁ থিতাতে বিয়া বাতিল কৰি বৰযাত্ৰীসকলক উভতাই পঠাইছিল।
দুইখন ঘৰতে বিয়াৰ আয়োজন পূৰাদমে চলি আছিল। যথাসময়ত কইনাৰ ঘৰত উপস্থিত হয় বৰযাত্ৰী। বিবাহৰ সকলো ৰীতি-নীতি চলি আছিল। দৰা-কইনাই সাতে ফেৰেও লয়।
সাত ফেৰে সম্পূৰ্ণ হোৱাৰ লগে লগে দৰা মণ্ডপৰ দাঁতিত গৈ ধূমপান কৰিবলৈ ধৰিলে। কইনাজনীয়ে দৰাৰ এই কাৰ্যক চাই আছিল। হ’বলগীয়া স্বামীয়ে চিগাৰেট খোৱা দেখি কইনাৰ খং উঠিল আৰু তেওঁ বিয়া কৰিবলৈ অস্বীকাৰ কৰিলে। ইয়াকে লৈ কইনা আৰু দৰাৰ মাজত বিতৰ্ক আৰম্ভ হ’ল। দুয়োপক্ষৰ বয়োজ্যেষ্ঠসকলে কথা-বতৰাৰ জৰিয়তে সমস্যাটো সমাধান কৰিবলৈ চেষ্টা কৰিছিল যদিও কইনাজনী বিবাহৰ বাবে অসন্মত হয়।
দৰাৰ এই কাৰ্যৰ সন্দৰ্ভত কইনাগৰাকীয়ে কয় যে মই গোটেই জীৱন নিচাসক্ত ল’ৰাৰ লগত কটাব নোৱাৰো। নিচাসক্ত মানুহ মোৰ ভাল নালাগে। মোক আগতে কোৱা হোৱা নাছিল যে মোৰ হ’বলগীয়া স্বামীজন নিচাসক্ত। আজি তেওঁ চিগাৰেট খাই আছে, মইতো নাজানো তেওঁ হয়তো মদো খাব পাৰে। তেনেকুৱা মানুহক মই বিয়া নকৰাও।
এই গোচৰৰ তথ্য আৰক্ষীক দিয়া হয়। ইয়াৰ পাছত সেই স্থানত উপস্থিত হোৱা আৰক্ষীয়ে দুয়োপক্ষৰ লগত মিলামিছা কৰি বিয়াখন পাতিবলৈ চেষ্টা কৰে যদিও কইনাই সন্মতি নিদিয়াত গোচৰটো নিষ্পত্তি হয়। দুয়োপক্ষই ইজনে সিজনৰ পৰা লোৱা ধন ঘূৰাই দিয়াৰ সিদ্ধান্ত লয় আৰু তাতেই বিষয়টো নিষ্পত্তি হ’ল।
আৰক্ষী অবনীশ কুমাৰ সিঙে জনোৱা মতে, এই পৰ্যন্ত হোৱা খৰচৰ লেনদেন কৰি দুয়োপক্ষই নিষ্পত্তি কৰে। ইয়াৰ পিছত বিষয়টো শান্ত হৈ পৰিল। উত্তৰ প্ৰদেশৰ উন্নাও জিলাত সংঘটিত হৈছে আজৱ ঘটনা।
Continue Reading
