ডিজিটেল ডেস্ক: অত্যাৱশ্যকীয় সামগ্ৰীৰ দামবৃদ্ধিয়ে সৰ্বস্বান্ত কৰিছে জনতাক৷ আকাশলংঘী দামবৃদ্ধিত দিকবিদিগ হেৰুৱাইছে সাধাৰণ জনতাই৷ বিলাহীৰ দামে গঢ়িছে অভিলেখ৷ তাৰ মাজতেই বৃহৎ পৰিমাণৰ বিলাহী চুৰি হোৱাৰ খবৰ আহি পৰিছে৷
কৰ্ণাটকৰ হাছান জিলাত অচিনাক্ত দুৰ্বৃত্তই এখন খেতিপথাৰৰ পৰা ১.৫ লাখ টকাৰ বিলাহী চুৰি কৰি পলাই যোৱাৰ অভিযোগ উঠিছে৷ গোনি সোমানাহাল্লি গাঁৱৰ ফাৰ্মত উপস্থিত হোৱাৰ পাছত ধৰণী নামৰ এজন কৃষকে তেওঁ কপালৰ ঘাম মাটিত পেলাই উৎপাদন কৰা বিলাহী চুৰি হোৱা দেখি হতবাক হৈ পৰে, যাৰ পাছত তেওঁ হালেবিদু আৰক্ষী থানাত অভিযোগ দাখিল কৰে।
কৃষকজনৰ মতে, চোৰে প্ৰায় ৫০-৬০খন মোনা লৈ খেতিপথাৰত প্ৰৱেশ কৰিছিল আৰু তেওঁলোকে ১.৫ লাখ টকা মূল্যৰ বিলাহী লৈ পলাই গৈছিল।
আৰক্ষীয়ে কৃষকজনৰ গোচৰটোৰ সন্দৰ্ভত ভাৰতীয় দণ্ডবিধিৰ (আইপিচি) ৩৭৯ ধাৰাৰ অধীনত এটা গোচৰ ৰুজু কৰিছে। তথ্য অনুসৰি, বেংগালুৰুত বিলাহীৰ বৰ্তমান মূল্য প্ৰতি কিলোগ্ৰামত ১০০-১২০ টকাৰ ভিতৰত। আকাশচুম্বী বিলাহীৰ মূল্য এই বছৰ কৰ্ণাটকৰ কিছু কিছু ঠাইত বৰষুণৰ অভাৱ আৰু সাৰৰ অত্যধিক মূল্যৰ বাবে বৃদ্ধি হৈছে ৷
