ডাউন ছিণ্ড্ৰোমত আক্ৰান্ত এগৰাকী কিশোৰী, হাতত ধৰি লৈ গ’ল বিদ্যালয়লৈ, পঢ়ালে পাঠ; কোন ৰাষ্ট্ৰপতিৰ মহা

ডিজিটেল ডেস্কঃ উত্তৰ মেচিডোনিয়াত ডাউন ছিণ্ড্ৰোমত আক্ৰান্ত এগৰাকী ১১ বছৰীয়া কিশোৰীৰ কাষত ৰাষ্ট্ৰপতি ষ্টিভ’ পেণ্ডাৰোভস্কী। ডাউন ছিণ্ড্ৰোমৰ বাবে বিদ্যালয়ত অতিষ্ঠ হৈ পৰা কিশোৰীগৰাকীৰ বিষয়ে জানিবলৈ পোৱাত ৰাষ্ট্ৰপতিগৰাকীয়ে নিজে কিশোৰীগৰাকীক সহায় কৰিবলৈ আগবাঢ়ি আহিছিল। কেৱল সেয়াই নহয় কিশোৰীগৰাকীক বিদ্যালয়লৈও লৈ গৈছিল ৰাষ্ট্ৰপতিগৰাকীয়ে। মন কৰিবলগীয়া যে, ডাউন ছিণ্ড্ৰোম হৈছে এক আনুবংশিক ৰোগ। এই ৰোগত আক্ৰান্ত শিশুৰ মানসিক আৰু শাৰীৰিক বিকাশত ব্যাধাত জন্মে। এই ৰোগত আক্ৰান্তজনৰ শিক্ষা গ্ৰহণত অসুবিধা হোৱাৰ লগতে স্বাস্থ্যজনিত নানা সমস্যাৰো সন্মুখীন হ’বলগীয়া হয়। জানিবলৈ পোৱা মতে, ৰাষ্ট্ৰপতি ষ্টিভ’ৱে এম্বলা এডেমীৰ অভিভাৱকৰ সৈতে বিদ্যালয়ত পোৱা অসুবিধা আৰু সন্মুখীন হোৱা দৈনন্দিন প্ৰত্যাহ্বানৰ বিষয়ে কথা পাতিছিল। এম্বোলাই মেচিডোনিয়াৰ গোষ্টিভাৰত বাস কৰে। বিদ্যালয়খনত বৈষম্যমূলক আচৰণৰ সন্মুখীন হোৱা এম্বলাৰ বিষয়ে জানিবলৈ পোৱাৰ পাছত ৰাষ্ট্ৰপতি পাণ্ডাৰোভস্কীয়ে কিশোৰীগৰাকীৰ সৈতে তেওঁৰ প্ৰাথমিক বিদ্যালয় 'এডিনবাৰ্গভো'লৈ গৈছিল। ৰাষ্ট্ৰপতিৰ কাৰ্যালয়ৰ পৰা প্ৰকাশিত এক প্ৰেছ বিজ্ঞপ্তি অনুসৰি, পাণ্ডাৰোস্কীয়ে এম্বলাৰ পিতৃ-মাতৃৰ সৈতে তেওঁলোকে দৈনিক সন্মুখীন হৈ অহা প্ৰত্যাহ্বানৰ বিষয়ে কথা পাতিছিল। তেওঁলোকৰ এই সমস্যাটোৰ সমাধানৰ বিষয়েও আলোচনা কৰে ৰাষ্ট্ৰপতিগৰাকীয়ে। ৰাষ্ট্ৰপতিগৰাকীয়ে কয় , ‘যিসকলে শিশুৰ অধিকাৰ বিপন্ন কৰে তেওঁলোকৰ আচৰণ গ্ৰহণযোগ্য নহয়।বিশেষকৈ, যেতিয়া বিষয়টো এনেধৰণৰ শিশুৰ ক্ষেত্ৰত দেখা দিয়ে।’ বিবৃতিটোত কোৱা হৈছে, ‘এনে শিশুৱে কেৱল তেওঁলোকৰ অধিকাৰ উপভোগ কৰা উচিতেই নহয় বৰঞ্চ তেওঁলোকে বিদ্যালয়ৰ চৌহদতো নিজেকে আন শিক্ষাৰ্থীৰ দৰে ভাবিব পৰাকৈ পৰিৱেশ দিব লাগে। প্ৰতিগৰাকী নাগৰিকৰে এয়া দায়বদ্ধতা।’ স্বাভাৱিকতে ৰাষ্ট্ৰপতিগৰাকীৰ পৰা এই সঁহাৰি তথা সমৰ্থনে কন্যাৰ অধিকাৰ সুৰক্ষাৰ যুঁজত উৎসাহিত কৰি তুলিছে এম্বলাৰ পিতৃ-মাতৃক।