ডিজিটেল ডেস্কঃ চলিত বৰ্ষত সমগ্ৰ দেশতে গৰমে তাণ্ডৱ চলাব। সেই কথাৰ প্ৰমাণ ইতিমধ্যে পোৱা গৈছে। বহু ৰাজ্যত গৰমৰ প্ৰকোপত মানুহকে ধৰি আন জীৱৰ মৃত্যু ঘটিছে। ইয়াৰ মাজতে বতৰ বিজ্ঞান বিভাগে দেশৰ নখন ৰাজ্যত তীব্ৰ গ্ৰীষ্ম প্ৰবাহৰ সতৰ্কবাণী জাৰি কৰিছে। অসমৰ কাষৰীয়া পশ্চিমবংগও এই নখন ৰাজ্যৰ ভিতৰতে আছে।
উৰিষ্যা, বিহাৰ, অন্ধ্ৰ প্ৰদেশ, ঝাৰখণ্ড, উত্তৰ প্ৰদেশ, পঞ্জাৱ, হাৰিয়ানা আৰু ছিকিমৰ বাবেও গ্ৰীষ্ম প্ৰবাহৰ সতৰ্কবাণী জাৰি কৰা হৈছে। এই ৰাজ্যসমূহৰ ভিতৰত পশ্চিম বংগ, বিহাৰ আৰু অন্ধ্ৰ প্ৰদেশত তাপমাত্ৰা ভয়াৱহভাবে বৃদ্ধি হোৱাৰ সম্ভাৱনা আছে । পশ্চিম বংগত যোৱা কেইদিনমানৰ পৰা গ্ৰীষ্ম প্ৰবাহে তাণ্ডৱৰ সৃষ্টি কৰিছে। যোৱা ২৪ ঘণ্টাত কলকাতাত সৰ্বাধিক তাপমাত্ৰা আছিল ৪০ ডিগ্ৰী চেলচিয়াছ। যি স্বাভাৱিকতকৈ ৪ ডিগ্ৰী অধিক।
ৰাজ্যখনৰ ২০ খন চহৰৰ তাপমাত্ৰা ৪০ ডিগ্ৰী চেলচিয়াছৰ ওচৰত আছিল। ৰাজ্যখনত গ্ৰীষ্ম প্ৰবাহৰ তাণ্ডৱ ২১ এপ্ৰিললৈকে অব্যাহত থকাৰ সম্ভাৱনা আছে।পশ্চিম বংগৰ উপৰি চুবুৰীয়া ৰাজ্য উৰিষ্যা আৰু বিহাৰতো পাৰাস্তম্ভ বৃদ্ধি পাইছে। উৰিষ্যাৰ কেইবাখনো জিলাত সৰ্বাধিক তাপমাত্ৰাই ৪০ ডিগ্ৰী চেলচিয়াছ অতিক্ৰম কৰিছিল। বিহাৰৰ পৰিস্থিতিও একেই। সোমবাৰে পঞ্জাৱ আৰু হাৰিয়ানাত গ্ৰীষ্ম প্ৰবাহৰ পৰিস্থিতি অব্যাহত আছিল। মঙলবাৰেও দুয়োখন ৰাজ্যত গ্ৰীষ্ম প্ৰবাহ অব্যাহত থাকিব বুলি কোৱা হৈছে।
তেলেংগানাৰ জয়শংকৰ ভূপালপল্লী জিলাত সোমবাৰে সৰ্বাধিক তাপমাত্ৰা ৪৪.৬ ডিগ্ৰী চেলচিয়াছ ৰেকৰ্ড কৰা হৈছিল। উত্তৰ প্ৰদেশৰ চুলতানপুৰত সৰ্বাধিক তাপমাত্ৰা ৪৩.৪ ডিগ্ৰী চেলচিয়াছ ৰেকৰ্ড কৰা হৈছে। ইয়াৰ উপৰি এই নখন ৰাজ্যৰ কেইবাখনো জিলাত সৰ্বাধিক তাপমাত্ৰা ৪০ ডিগ্ৰী অতিক্ৰম কৰিছে। প্ৰচণ্ড গৰমৰ ফলত অসুস্থ হৈ মহাৰাষ্ট্ৰত কমেও ১৩ জন লোকৰ মৃত্যু হৈছে। মৃত্যু ঘটা লোক কেইজন 'মহাৰাষ্ট্ৰ ভূষণ বঁটা' অনুষ্ঠানত উপস্থিত আছিল। প্ৰখৰ ৰ'দত দৰ্শকসকল মুকলি আকাশৰ তলতে বহিছিল। ফলস্বৰূপে হিট ষ্ট্ৰোকৰ ফলত ১৩ জন লোকৰ মৃত্যু হয়। অনুষ্ঠানটোত কেন্দ্ৰীয় গৃহ মন্ত্ৰী অমিত শ্বাহে অংশগ্ৰহণ কৰিছিল।
Continue Reading
