ডিজিটেল ডেস্কঃ নীতি আয়োগৰ বৈঠক বৰ্জন কৰিলে ১১ গৰাকী বিৰোধী দলৰ মুখ্যমন্ত্ৰীয়ে। কেন্দ্ৰৰ বঞ্চনা তথা ফেডাৰেল গাঁথনিত আক্ৰমণ কৰাকে ধৰি একাধিক বিষয়ৰ বিৰোধিতাৰে বৰ্জন কৰিলে নীতি আয়োগৰ বৈঠক। এই সন্দৰ্ভত প্ৰতিক্ৰিয়া প্ৰকাশ কৰি কেন্দ্ৰই কয়, ''যিসকল নাহিল তেওঁলোকৰে লোকচান হ’ব।’’
এই নীতি আয়োগৰ বৈঠক বৰ্জন কৰা মুখ্যমন্ত্ৰীসকলৰ ভিতৰত নীতিশ কুমাৰ, মমতা বেনাৰ্জী, অৰবিন্দ কেজৰিৱাল, অশোক গেহলট, এম কে ষ্টেলিন, সিদ্দাৰামাইয়া, ভগৱন্ত সিং মান, পিনাৰাই বিজয়নৰ লগতে চন্দ্ৰশেখৰ ৰাও, নবীন পাটনায়ক অন্যতম।
নীতি আয়োগৰ চিইঅ’ বিভিআৰ সুব্ৰমনিয়মে কয়, “১১গৰাকী মুখ্যমন্ত্ৰীয়ে বৈঠকত উপস্থিত নাছিল। কিন্তু বহুত আহিছে। এই ধৰণৰ অনুপস্থিতি মই আগতেও দেখিছো। হয়তো সেই মুখ্যমন্ত্ৰীসকলৰ ব্যক্তিগত কোনো কাৰণ আছিল।”
তাৰ পিছতে নীতি আয়োগৰ চিইঅ’ গৰাকীয়ে অলপ কটাক্ষৰ সুৰত বিৰোধীসকলক উদ্দেশ্যি কয়, “আপুনি যদি সভালৈ নাহে তেন্তে লোকচান আপোনাৰ। আমি কোৱা নাই যে আপোনালোক নাহিল বুলি আপোনালোকক বৰ্জন কৰিম। আমি সমগ্ৰ দেশৰ বাবে পৰিকল্পনা কৰিম। কোনো ৰাজ্য বাদ দিয়া নহয়। কিন্তু যিসকল নাহিল তেওঁলোকৰে ক্ষতি হ’ব।”
বিভিআৰ সুব্ৰমনিয়ামে জনায় যে প্ৰধানমন্ত্ৰীয়েও কেন্দ্ৰৰ সকলো নীতি ৰাজ্যিক পৰ্যায়ত কাৰ্যকৰী কৰিবলৈ দৃঢ়প্ৰতিজ্ঞ। তেওঁ কয়- ''প্ৰধানমন্ত্ৰীয়ে জনাইছে যে যিহেতু আমাৰ থিম বিকশিত ভাৰত, গতিকে আমি কেৱল কেন্দ্ৰীয় পৰ্যায়ত নীতি প্ৰণয়ন কৰা উচিত নহয়। ৰাজ্যিক পৰ্যায়ত নীতি প্ৰণয়ন কৰিব লাগিব। জিলা পৰ্যায়ত নীতি প্ৰণয়ন কৰিব লাগিব।”
Continue Reading
