ডিজিটেল ডেস্কঃ কোভিডৰ ভয় এতিয়াও দেশৰ পৰা সম্পূৰ্ণ ৰূপে দূৰ হোৱা নাই৷ অৱশ্যে ইয়াৰ মাজতে ভাল খবৰটো এয়াই যে দেশত কোভিডগ্ৰাফ ক্ৰমে নিম্নমুখী হৈছে ৷ দেওবাৰৰ পৰিসংখ্যাই সেয়াই স্পষ্ট কৰি তুলিছে। দীৰ্ঘদিনৰ পিছত দেশত সক্ৰিয় কৰোনা ৰোগীৰ সংখ্যা এক লাখৰ তললৈ হ্ৰাস পাইছে। কেৱল সেয়াই নহয়, দেশৰ দৈনিক আক্ৰান্ত ৰোগীৰ সংখ্যাও হ্ৰাস পাইছে।
স্বাস্থ্য আৰু পৰিয়াল কল্যাণ মন্ত্ৰালয়ে জনোৱা অনুসৰি যোৱা ২৪ ঘণ্টাত দেশখনত ১১,৫৩৯ জন লোক কৰোনাত আক্ৰান্ত হৈছে৷ কালি এই সংখ্যা আছিল ১৩,০০০ তকৈও অধিক। যোৱা ২৪ ঘণ্টাত সক্ৰিয় ৰোগীৰ সংখ্যাও হ্ৰাস পাইছে। বৰ্তমান দেশত ৯৯,৮৭৯ গৰাকী সক্ৰিয় কৰোনা ৰোগী আছে।
স্বাস্থ্য মন্ত্ৰালয়ৰ বুলেটিন অনুসৰি ভাৰতত এদিনতে ৪৩ জন লোকে কোভিডত প্ৰাণ হেৰুৱাইছে। দেশত এতিয়ালৈকে কোভিড-১৯ৰ ফলত হোৱা মুঠ মৃত্যুৰ সংখ্যা হৈছে ৫ লাখ ২৭ হাজাৰ ৩৩২।পৰিসংখ্যা অনুসৰি, এতিয়ালৈকে দেশত ৪ কোটি ৩৭ লাখ ১২ হাজাৰ ২১৮ জন লোকে কৰোনাৰ পৰা আৰোগ্য লাভ কৰিছে। বৰ্তমান আৰোগ্যৰ হাৰ হৈছে ৯৮.৫৯ শতাংশ।
কিন্তু ৰাজধানী দিল্লীৰ কোভিড পৰিস্থিতিৰ উদ্বেগজনক হৈয়েই আছে। যোৱা ২৪ ঘণ্টাত কেৱল ৰাজধানীত চহৰ খনত১,১০৯ গৰাকী লোক কৰোনাত সংক্ৰমিত হৈছে। নজন লোকৰ মৃত্যু হৈছে। আশংকা কৰা হৈছে যে দিল্লীত ওমাইক্ৰনৰ এটা নতুন উপ-প্ৰকাৰৰ সংক্ৰমণ ঘটিছে৷
স্বাস্থ্য আৰু পৰিয়াল কল্যাণ মন্ত্ৰালয়ে প্ৰদান কৰা তথ্য অনুসৰি, দেশত এতিয়ালৈকে ২০৯ কোটি ৬৭ লাখৰো অধিক কোভিড ভেকছিন প্ৰদান কৰা হৈছে। যোৱা ২৪ ঘণ্টাত প্ৰায় ২৬ লাখ লোকক টিকাকৰণ কৰা হৈছে। টিকাকৰণৰ উপৰিও কৰোনা ৰোগী চিনাক্ত কৰাৰ বাবে পৰীক্ষাৰ ওপৰতো গুৰুত্ব দিয়া হৈছে। কালি দেশত মুঠ এক লাখ ২২ হাজাৰ ৬৫৭ টা নমুনা পৰীক্ষা কৰা হৈছে৷
Continue Reading
