'লালকিল্লা মোৰ' বুলি দাবী মোগল বোৱাৰীৰ! কোৰ্টৰ প্ৰশ্ন-১৫০ বছৰৰ পাছত মনত পৰিল যে?

ডিজিটেল ডেস্কঃ লালকিল্লা মোৰ..লালকিল্লা মোক ঘূৰাই দিয়ক…দেশৰ ৰাজধানী দিল্লীত থকা লালকিল্লা নিজৰ বুলি দাবী কৰিছে এগৰাকী মহিলাই। নিজকে লালকিল্লাৰ মালিক বুলি কৈছে মহিলাগৰাকীয়ে। মহিলাগৰাকী হৈছে অন্তিমগৰাকী মোগল সম্ৰাট বাহাদুৰ শ্বাহ জফৰৰ নাতি বোৱাৰী। তেওঁৰ নাম চুলতানা বেগম। সোমবাৰে দিল্লী উচ্চ ন্যায়ালয়ৰ দাৰস্থ হৈছিল চুলতানা। চুলতানা বেগমে লালকিল্লা নিজৰ বুলি দাবী তুলি আবেদন জনাইছিল ন্যায়ালয়ত। দিল্লী উচ্চ ন্যায়ালয়ে দিল্লীৰ ঐতিহাসিক লালকিল্লাৰ ওপৰত নিজৰ কৰ্তৃত্ব দাবী কৰা অন্তিম মোগল সম্ৰাট বাহাদুৰ শ্বাহ জাফৰৰ নাতি বোৱাৰী চুলতানা বেগমৰ আবেদন নাকচ কৰিছে।

চুলতানা বেগমে কৈছিল যে ১৮৫৭ চনত ব্ৰিটিছ ইষ্ট ইণ্ডিয়া কোম্পানীয়ে বলপূৰ্বক লালকিল্লা দখল কৰিছিল। সেয়ে পুনৰ ইয়াৰ অধিকাৰ প্ৰকৃত মালিকৰ হাতত অৰ্পণ কৰে যেন। আৰু সেই হিচাপে তেখেতেই বৰ্তমান ইয়াৰ প্ৰকৃত দাবীদাৰ। চুলতানা বেগমৰ আৱেদন উচ্চ ন্যায়ালয়ৰ ন্যায়াধীশ ৰেখা পল্লীৰ একক ন্যায়াধীশৰ বিচাৰপীঠৰ সন্মুখত তালিকাভুক্ত কৰা হৈছিল। ন্যায়াধীশ পল্লীয়ে কয় যে, চুলতানা বেগম আপুনি দাবী কৰিছে যে ১৮৫৭ চনত ব্ৰিটিছ ইষ্ট ইণ্ডিয়া কোম্পানীয়ে আপোনালোকৰ লগত অন্যায় কৰিছিল,লালকিল্লা বলপূৰ্বক কাঢ়ি লৈছিল। কিন্তু এই কৰ্তৃত্ব দাবী কৰাত আপোনালোকৰ ১৫০ বছৰতকৈ অধিক পলম কিয় হল?ইমান বছৰ আপোনালোক ক'ত আছিল। এতিয়াহে কিয় মনত পৰিল? আপোনাৰ আবেদন আমি নাকচ কৰিছো।

তেওঁ লগতে কয় যে চুলতানাৰ পূৰ্বপুৰুষসকলে লালকিল্লা নিজৰ বুলি দাবী কৰি একো কৰা নাছিল, আদালতে এতিয়া কি কৰিব পাৰে? আৱেদন দাখিল কৰাত ইমান পলম কিয় হৈছে বুলি সোধাত সেই বিষয়ে তেওঁলোকৰ ওচৰত কোনো ব্যাখ্যা নাই বুলি কয় চুলতানা বেগমে। কোনো যুক্তি প্ৰদৰ্শন কৰিব নোৱাৰা বাবেই চুলতানা বেগমৰ আবেদন নাকচ কৰে দিল্লী উচ্চ ন্যায়ালয়ে।

আৰু পঢ়কঃ ‘বিধায়ক কিনা বেচা বজাৰ বন্ধ কৰক’! প্ৰতিবাদ কৰি নিজেই বিক্ৰী গ’ল নেকি বিধায়ক শশীকান্ত?