দেশত বৃদ্ধি পাইছে ক’ভিডৰ সংক্ৰমণ: এইবাৰ আক্ৰান্ত হ’ল অমৰ্ত্য সেন

ডিজিটেল ডেস্ক: দেশত পুনৰ বৃদ্ধি পাইছে ক’ভিডৰ সংক্ৰমণ৷ এইবাৰ ক’ভিডত আক্ৰান্ত হৈছে দেশৰ প্ৰখ্যাত অৰ্থনীতিবিদ অমৰ্ত্য সেন৷ অমৰ্ত্য সেন ক’ভিডত আক্ৰান্ত হোৱাৰ খবৰ বিয়পি পৰাৰ লগে লগে স্বাভাৱিকতে উদ্বিগ্ন হৈ পৰিছে তেওঁৰ শুভাকাংক্ষীসকল৷

পশ্চিম বংগৰ মুখ্যমন্ত্ৰী মমতা বেনাৰ্জীয়ে অমৰ্ত্য সেনৰ আৰোগ্য কামনা কৰিছে৷ ক’ভিডত আক্ৰান্ত সেনে তেওঁৰ শান্তিনিকেতনৰ বাসভৱনত ‘হোম আইচ’লেশ্যন’ত আছে৷ বৰ্তমান তেওঁ কেৱল মৃদু কাহ আৰু হাঁচি অনুভৱ কৰি আছে বুলি স্বাস্থ্য বিভাগৰ এজন বিষয়াই কয়।

মুখ্যমন্ত্ৰী মমতা বেনাৰ্জীয়ে আৰোগ্য কামনা কৰি টুইটযোগে কয়, সন্মানীয় অমৰ্ত্য দা, আমি সকলোৱে আন্তৰিকতাৰে প্ৰাৰ্থনা কৰোঁ যাতে আপুনি সোনকালে সুস্থ হৈ উঠে৷

সেন জুনৰ শেষ সপ্তাহৰ পৰা ভাৰতত আছে।

উল্লেখযোগ্য যে, কেন্দ্ৰীয় স্বাস্থ্য মন্ত্ৰণালয়ৰ তথ্য অনুসৰি ভাৰতত চৌবিশ ঘণ্টাত ১৮,৮৪০জন লোক ক’ভিডত আক্ৰান্ত হৈছে৷ আৰু মৃত্যু হৈছে ৪৩গৰাকী লোকৰ৷ বৰ্তমান দেশত ১,২৫,০২৮গৰাকী ব্যক্তি ক’ভিডত আক্ৰান্ত হৈ আছে৷ বৰ্তমান পজিটিভিটীৰ হাৰ ০.২৮ শতাংশ৷