ডিজিটেল ডেস্কঃ জনতাৰ প্ৰতিবাদৰ পিছতো দেশত শীঘ্ৰে কাৰ্যকৰী হ’ব নাগৰিকত্ব (সংশোধনী) আইন৷ নাগৰিকত্ব (সংশোধনী) আইন (চিএএ) সন্দৰ্ভত মন্তব্য কৰি কেন্দ্ৰীয় গৃহ ৰাজ্যমন্ত্ৰী অজয় মিশ্ৰ টেনিয়ে কয়, "এই বিধেয়কখন ৯ ডিচেম্বৰ, ২০১৯ত লোকসভাত গৃহীত হৈছিল। ৰাজ্যসভাত, ইয়াক ১১ ডিচেম্বৰ, ২০১৯ তাৰিখে গৃহীত কৰা হৈছিল। ১২ ডিচেম্বৰত ইয়াক এখন আইন হিচাবে গ্ৰহণ কৰা হৈছিল।২০২০ চনৰ ১০ জানুৱাৰীত, আইনখন কাৰ্যকৰী কৰাৰ ব্যৱস্থা গ্ৰহণ কৰা হয়।
আইন এখন হোৱাৰ পিছত কিছুমান নিয়ময়াৱলী প্ৰস্তুত কৰিব লাগে। লোকসভাৰ সংসদীয় সমিতিয়ে অহা বছৰৰ ৯ জানুৱাৰীৰ ভিতৰত তেনে নিয়ম নিৰ্ধাৰণ কৰিব৷ ৰাজ্যসভাৰ সমিতিক ৩০ মাৰ্চ, ২০২৪ৰ সময়সীমা বন্ধি দিয়া হৈছে। তেওঁ জোৰ দি কয় যে নিশ্চিতভাৱে নাগৰিকত্ব (সংশোধনী) আইন কাৰ্যকৰী কৰা হ'ব। উল্লেখ্য এই আইনৰ বিৰুদ্ধে কেইবাটাও বিৰোধী দলে উচ্চতম ন্যায়ালয়লৈ গৈছে আৰু আইন খন বাতিল কৰিবলৈ আবেদন দাখিল কৰিছে।
মন্ত্ৰীগৰাকীয়ে কয় "আমাৰ বিৰুদ্ধে বিৰোধী দলবোৰে ২২০ খন আৱেদন দাখিল কৰিছে..." ৷ উল্লেখ্য সমগ্ৰ দেশজুৰি এই আইনৰ বিৰুদ্ধে প্ৰতিবাদ হৈছিল৷ অসমতো "কা" বিৰোধী আন্দোলনত ৫ জনকলৈ লোকে প্ৰাণ হেৰুৱাইছিল৷ কেন্দ্ৰীয় মন্ত্ৰীগৰাকীৰ ঘোষণাৰ পিছত বিৰোধী দলসমূহৰ প্ৰতিক্ৰিয়া কেনে হয় সেয়া লক্ষ্যণীয় হ’ব৷
Continue Reading
