ধোৱাংবাং চীনা চৰকাৰৰ ক’ভিড শূন্য ৰণনীতি, এসপ্তাহত নতুনকৈ আক্ৰান্ত ১কোটি ১০লাখ

ডিজিটেল ডেস্কঃ বিশ্বজুৰি অব্যাহত আছে ক’ভিডৰ ত্ৰাস। ক’ভিডৰ সংক্ৰমণ ক্ৰমাত্‍ বৃদ্ধি পাইছে। এসপ্তাহত সংক্ৰমণৰ হাৰ ৮ শতাংশতকৈও অধিক বৃদ্ধি পাইছে। ৭ ৰ পৰা ১৩ মাৰ্চলৈ কৰ’না সংক্ৰমণৰ পৰিসংখ্যা বিশ্লেষণৰ পাছত বিশ্ব স্বাস্থ্য সংস্থাই এই কথা সদৰী কৰিছে। পৰিসংখ্যা অনুসৰি, এই সময়ছোৱাত বিশ্বত প্ৰায় ১কোটি ১০ লাখ লোক নতুনকৈ ক’ভিড-১৯ত আক্ৰান্ত হৈছে। প্ৰায় ৪৩,০০০ লোকৰ মৃত্যু হৈছে। জানুৱাৰীৰ পাছত কৰ’না সংক্ৰমণৰ উৰ্ধ্বগামী গ্ৰাফে বিশ্ববাসীক উদ্বিগ্ন কৰি তুলিছে বুলিও কয় বিশ্ব স্বাস্থ্য সংস্থাই। চীন আৰু দক্ষিণ কোৰিয়াৰ দৰে এছিয়াৰ দেশসমূহৰ এইবাৰ কৰ’না সংক্ৰমণৰ হাৰ ২৫ শতাংশ। প্ৰতিবেদনখনে এই পৰিঘটনাক উদ্বেগজনক বুলি আখ্যা দিছে। অৱশ্যে, এই পৰিসংখ্যা বোৰতকৈ বাস্তৱ পৰিস্থিতি অধিক গুৰুতৰ বুলি বিশ্ব স্বাস্থ্য সংস্থাৰ সঞ্চালক টেড্ৰোছ আদানোম গেব্ৰেয়ুচাছে মন্তব্য কৰিছে। তেওঁ কয়, ‘বহুতো দেশত পৰীক্ষাৰ হাৰ যথেষ্ট হ্ৰাস পাইছে। ইয়াৰ স্বত্বেও, সংক্ৰমণৰ হাৰ বৃদ্ধি হৈ গৈ আছে।’ স্মৰ্তব্য যে, চীনা চৰকাৰে ইতিমধ্যে কৰ’না সংক্ৰমণ প্ৰতিৰোধ কৰিবলৈ জিনিন প্ৰদেশক সম্পূৰ্ণৰূপে পৃথক কৰাৰ সিদ্ধান্ত লৈছিল। তথাপি, দেশৰ বিভিন্ন চহৰৰ নাগৰিকসকল গৃহবন্দী কৰিও কৰ’না সংক্ৰমণ নিয়ন্ত্ৰণ কৰিব পৰা হোৱা নাই। এনে পৰিস্থিতিত, ছি জিনপিং চৰকাৰৰ 'ক’ভিড শূণ্য' ৰণনীতিক লৈ প্ৰশ্ন উত্থাপিত হৈছে। চুবুৰীয়া দেশ দক্ষিণ কোৰিয়াত বিগত ২৪ঘণ্টাত ৪লাখতকৈ অধিক লোক নতুনকৈ কৰ’নাত আক্ৰান্ত হৈছে। আনহাতে, আফ্ৰিকাত সংক্ৰমণৰ হাৰ ১২ শতাংশ আৰু ইউৰোপত ২ শতাংশলৈ বৃদ্ধি পোৱা দেখিবলৈ পোৱা গৈছে।