ডিজিটেল ডেস্কঃ ধৰ্ষণ কৰিবলৈ অহা এজন যুৱকক উচিত শাস্তি দিলে এগৰাকী মহিলাই। নিজৰ সাহস আৰু বুদ্ধিৰ বলত এক ভয়ংকৰ বিপদৰ পৰা নিজক ৰক্ষা কৰে মহিলাগৰাকীয়ে। সাহসী মহিলাগৰাকীয়ে তেওঁক ধৰ্ষণ কৰিবলৈ অহা কুচৰিত্ৰৰ যুৱকজনক কামুৰি আঘাত কৰি সাৰি আহিবলৈ সক্ষম হয়। জানিব পৰা মতে, ভুক্তভোগী মহিলাগৰাকীয়ে এখন পথাৰত কাম কৰি থকাৰ অৱস্থাত দুষ্ট প্ৰকৃতিৰ যুৱকজনে তেওঁক পাছফালৰ পৰা সাৱটি ধৰে। যুৱকজনে মহিলাগৰাকীক ধৰ্ষণৰ চেষ্টা চলায়।
মহিলাগৰাকীয়ে যুৱকজনৰ হাতৰ পৰা নিজক ৰক্ষা কৰিবলৈ দেহ-প্ৰাণ দি চেষ্টা চলায়। যুৱকজনৰ কঠিন দুবাহুৰ পৰা মুক্ত হ’বলৈ বাৰে বাৰে চেষ্টা চলায় মহিলাগৰাকীয়ে।অৱশেষত সাহসী মহিলাগৰাকীয়ে নিজৰ দাঁতেৰে যুৱকজনৰ ওঁঠত উপৰ্যুপৰি কামুৰ মাৰে। ফলত ওঁঠ ছিগি যায় যুৱকজনৰ। বিষ আৰু ধাৰাষাৰ তেজ বৈ যোৱাৰ ফলত মহিলাগৰাকীক এৰি দিবলৈ বাধ্য হয় ধৰ্ষণকামী যুৱকজনে। ইয়াৰ পাছতেই মহিলাগৰাকীয়ে সমগ্ৰ ঘটনা গাঁৱৰ ৰাইজক বিৱৰি কোৱাত অলপ সময়ৰ ভিতৰতে গাঁৱৰ ৰাইজ গোট খাই যুৱকজনক ধৰি-বান্ধি থয়।
এই তথ্য লাভ কৰাৰ লগে লগে আৰক্ষীৰ এটা দল ঘটনাস্থলীত উপস্থিত হয়। আৰক্ষীয়ে যুৱকজনক নিজৰ জিম্মাত লৈ সেই স্থানৰ পৰা তেওঁৰ ওঁঠৰ ফাটি যোৱা অংশটো উদ্ধাৰ কৰে। ইয়াৰ পাছত যুৱকজনক দৌৰালাৰ সামূহিক স্বাস্থ্য কেন্দ্ৰত চিকিৎসাৰ বাবে ভৰ্তি কৰোৱা হয়। মহিলাগৰাকীৰ সাহসক সকলোৱে প্ৰশংসা কৰিছে। এই ঘটনা উত্তৰ প্ৰদেশৰ মেৰুটৰ।
Continue Reading
