ডিজিটেল ডেস্কঃ অষ্ট্ৰেলিয়া ক্ৰিকেট ব’ৰ্ডৰ ভাল আন্তঃগাঁথনিৰ বাবে পৰিচিত। অষ্ট্ৰেলিয়াত বহুতো ডাঙৰ আৰু আধুনিক ষ্টেডিয়াম আছে। ইয়াৰ ভিতৰত পাৰ্থ, এডিলেইড, ছিডনী আৰু ব্রিজবেনৰ ষ্টেডিয়াম আটাইতকৈ বিখ্যাত। ভাৰতৰ দৰেই ঘৰুৱা ক্ৰিকেট আৰু অন্যান্য প্ৰতিযোগিতাৰ বাবে ষ্টেডিয়াম আছে যদিও ইয়াৰে মাত্ৰ ৬ খনতে আন্তঃৰাষ্ট্ৰীয় ক্ৰিকেট অনুষ্ঠিত হয়।
এতিয়া ব’ৰ্ডে এনে এখন ষ্টেডিয়ামৰ পৰিকল্পনা কৰিছে য’ত প্ৰতিটো ছিজনতে ক্ৰিকেট খেলিব পৰা যাব। ইয়াৰ বাবে তাছমেনিয়া ক্ৰিকেট ব’ৰ্ডৰ সহযোগত হোবাৰ্ট চহৰত চালযুক্ত এখন ষ্টেডিয়াম নিৰ্মাণৰ পৰিকল্পনা কৰিছে। ধুমুহা আহিলেও, ধাৰষাৰ বৰষুণ হ’লেও এই ক্ৰিকেট ষ্টেডিয়ামত বন্ধ নহয় খেল।
ক্ৰিকেট খেলত বতৰৰ গুৰুত্বপূৰ্ণ ভূমিকা থাকে। এই খেলত বৰষুণ এটা ডাঙৰ সমস্যা হৈ পৰে। বহু সময়ত বৰষুণৰ বাবে মেচ বাতিল কৰিবলগীয়া হয়। ই এছ পি এন ক্ৰীচিনফ’ৰ প্ৰতিবেদন অনুসৰি অষ্ট্ৰেলিয়া ক্ৰিকেটে সেয়েহে তাছমেনিয়া ক্ৰিকেট ব’ৰ্ডৰ সহযোগত এখন ছাদযুক্ত ষ্টেডিয়ামৰ পৰিকল্পনা কৰিছে। তাছমেনিয়া ক্ৰিকেটে ৰঙা বল অৰ্থাৎ টেষ্ট ক্ৰিকেটৰ কথা মনত ৰাখি এই ষ্টেডিয়াম নিৰ্মাণ কৰিব বিচাৰিছে।
ইয়াৰ বাবে তেওঁলোকে মেকুৱেৰী পইণ্ট ডেভেলপমেণ্ট কৰ্প’ৰেশ্যন নামৰ কোম্পানী এটাৰ সৈতে যোগাযোগ কৰিছে। ইয়াৰ প্ৰতিনিধিয়ে কয় যে চিলিঙৰ উচ্চতা ইয়াৰ নিৰ্মাণত এক ডাঙৰ সমস্যা হৈ পৰিব পাৰে। তেওঁ আৰু কয় যে সাজু নোহোৱালৈকে একো ক’ব নোৱাৰি। ইয়াৰ ডিজাইনকে ধৰি আন সকলো গুৰুত্বপূৰ্ণ কামৰ ওপৰত বিতংভাৱে কাম চলি আছে।
কক্স আৰ্কিটেকচাৰৰ চিইঅ’ এলিষ্টাৰ ৰিচাৰ্ডছনে ষ্টেডিয়ামখনৰ ডিজাইনৰ কাম কৰি আছে। তেওঁৰ মতে, চিলিঙৰ উচ্চতা ক্ৰিকেট খেলত সমস্যাত পৰিণত হ’ব পাৰে, কিন্তু ইয়াৰ বাবেও সমাধান বিচাৰি উলিওৱা হৈছে। এই খণ্ডটোত তেওঁ হক আই আৰু বল ট্ৰেকিঙৰ দৰে প্ৰযুক্তিৰ পৰামৰ্শ দিছিল। ইয়াৰ জৰিয়তে এজন বেটছমেনে আঘাত কৰা বলৰ উচ্চতা জুখি সেই অনুসৰি বলটো কিমান ওখলৈ যাব পাৰে সেইটো অনুমান কৰা হ’ব।
সমগ্ৰ ষ্টেডিয়ামৰ ওপৰত চালি নিৰ্মাণ কৰিব বিচাৰিছে অষ্ট্ৰেলিয়া ক্ৰিকেটে। অৱশ্যে ইতিমধ্যে ডুবাইত এনে এখন ষ্টেডিয়াম আছে। ই ধুমুহাৰ পৰা ৰক্ষা কৰাত সহায় কৰে, কিন্তু ইয়াৰ চালখন অৰ্ধবৃত্তাকাৰ, অৰ্থাৎ ই ষ্টেডিয়ামখন সম্পূৰ্ণৰূপে আবৰি নাৰাখে। ইয়াৰ বাহিৰেও ইয়াক সীমাৰেখাৰ বাহিৰত নিৰ্মাণ কৰা হৈছে, আনহাতে অষ্ট্ৰেলিয়াৰ হোবাৰ্টত সীমাৰেখাৰ ওপৰৰ সমগ্ৰ খেলপথাৰখন সামৰি লোৱাৰ কথা চৰ্চা হৈছে।
Continue Reading
