ডিচেম্বৰৰ এটা বিশেষ সময়ত মাৰাত্মক হৃদৰোগৰ আক্ৰমণ বাঢ়ি যায়! কেতিয়া, কি কাৰণত

ডিজিটেল ডেস্ক : পৰিসংখ্যাগতভাৱে প্ৰতি বছৰে বিশ্বৰ সৰ্বাধিকসংখ্যক লোকে হৃদযন্ত্ৰৰ সমস্যাৰ বাবে প্ৰাণ হেৰুৱায়। ভাৰতত প্ৰতি বছৰে হঠাৎ হৃদযন্ত্ৰ বন্ধ হৈ প্ৰায় ৭ লাখ লোকৰ মৃত্যু হয়। যিকোনো ব্যক্তিৰ এই ৰোগ যিকোনো সময়তে হ’ব পাৰে। কিন্তু পৰিসংখ্যাগতভাৱে বছৰৰ এটা বিশেষ সময়ত এই ৰোগত আক্ৰান্ত হোৱাৰ সম্ভাৱনা বহু পৰিমাণে বৃদ্ধি পায়। আমেৰিকান হাৰ্ট এছ’চিয়েশ্যনৰ তথ্য অনুসৰি ডিচেম্বৰ মাহৰ শেষ সপ্তাহ অৰ্থাৎ বৰদিনৰ সময়ত এই ৰোগত আক্ৰান্ত হৈ বেছিভাগ লোকৰে মৃত্যু হয়।

 আমেৰিকান হাৰ্ট এছ’চিয়েশ্যনৰ তথ্য অনুসৰি শীতকালত মাৰাত্মক হৃদৰোগৰ সম্ভাৱনা কমেও ১০ শতাংশ বৃদ্ধি পায়। কিন্তু সেয়া কিয় হয়? চিকিৎসকে কয় যে তাপমাত্ৰা সলনিয়ে হৃদযন্ত্ৰত প্ৰভাৱ বিস্তাৰ কৰে। শীতকালত আমাৰ শৰীৰত ৰক্তবাহী নলী সংকুচিত হোৱাৰ প্ৰৱণতা থাকে। বিজ্ঞানৰ ভাষাত ইয়াক ‘ভেছ’কনষ্ট্ৰিকচন’ বুলি কোৱা হয়। এনে হ’লে শৰীৰৰ ৰক্তচাপ বৃদ্ধি পায়। গতিকে গোটেই শৰীৰলৈ তেজ যোগান ধৰিবলৈ আমাৰ হৃদযন্ত্ৰই অতিৰিক্ত কষ্ট কৰিবলগীয়া হয়। ডিচেম্বৰৰ শেষৰ ফালে সাধাৰণতে উত্তৰ গোলাৰ্ধত আটাইতকৈ ঠাণ্ডা হয়। বাহিৰৰ উষ্ণতা বেছিকৈ কমি গ’লে শৰীৰৰ স্বাভাৱিক উষ্ণতা বজাই ৰখাটো কঠিন হৈ পৰে। অত্যধিক চৰ্দিৰ ফলত ‘হাইপ’থাৰ্মিয়া’ হ’ব পাৰে। শৰীৰৰ উষ্ণতা হঠাতে কমি গ’লে হাইপোথাৰ্মিয়া বোলে। শৰীৰৰ কোনো অংশ ঠাণ্ডা হ’লে হৃদযন্ত্ৰই সেই অংশলৈ অধিক উষ্ণ তেজ প্ৰেৰণ কৰে। যদি গোটেই শৰীৰটো ঠাণ্ডা হৈ পৰে তেন্তে অতিৰিক্ত চাপ হৃদযন্ত্ৰৰ ওপৰত পৰে।

 যিসকলৰ ইতিমধ্যে কোনো ধৰণৰ হৃদযন্ত্ৰৰ সমস্যা আছে, তেওঁলোকৰ শৰীৰে এই পৰিস্থিতিৰ লগত খাপ খুৱাবলৈ কষ্ট হয়। ফলত শীতকালত শৰীৰৰ অক্সিজেনৰ প্ৰয়োজনীয়তা বাঢ়ি যায়। ৰক্তবাহী নলী সংকুচিত হোৱাৰ বাবে অক্সিজেনৰ অভাৱ হয়। সেয়েহে হৃদযন্ত্ৰলৈ অক্সিজেনৰ মাত্ৰা কমি যায়। ইয়াৰ ফলত হৃদৰোগৰ সম্ভাৱনাও বৃদ্ধি পায়।