ডিজিটেল ডেস্কঃ ৰেষ্টুৰেণ্টৰ খাদ্য এতিয়া ঘৰতে বহি সকলোৱে অনলাইনত অৰ্ডাৰ কৰিব পাৰে। বৰ্তমান সময়ত এই প্ৰক্ৰিয়া যথেষ্ট জনপ্ৰিয় হৈছে। শেহতীয়াকৈ এক খবৰ পোহৰলৈ আহিছে য'ত এজন লোকে খাদ্য অৰ্ডাৰ কৰি পাইছিল মাংসৰ হাড় আৰু এখন হৃদয় বিদাৰক চিঠি।
ডেমিয়ান চেণ্ডাৰছ নামৰ এজন ব্যক্তিয়ে এই দাবী কৰিছে। তেওঁ সমগ্ৰ ঘটনাৰ ভিডিঅ’ ৰেকৰ্ডিং কৰি ছ’চিয়েল মিডিয়াত প্ৰকাশ কৰে। তেওঁ ভিডিঅ’টোত কয় যে তেওঁ অনলাইনযোগে মুঠ তিনিটাকৈ খাদ্যৰ অৰ্ডাৰ দিছে। চিপচ, চিকেন উইংছ আৰু কল্ড ড্ৰিংকছ।
তেওঁ দাবী কৰে যে কল্ড ড্ৰিংকছটো ভালদৰে আহিছিল যদিও চিপছৰ পেকেটটো খালী হৈ আছিল। আৰু চিকেন উইংছৰ ঠাইত আছিল কুকুৰাৰ হাড়। কিন্তু খাদ্যৰ মোনাটোত হাতে লিখা চিঠি এখন আছিল। ফুড ডেলিভাৰী বয়জনে লিখিছিল এই চিঠিখন।
চিঠিখনত লিখা আছিল, ‘‘মোক ক্ষমা কৰা, তোমাৰ খাদ্য মই খালোঁ। মোৰ পেটটো ভোকত কলমলাই উঠিছিল। কিন্তু মোৰ হাতত টকা নাছিল। সেইবাবেই মই তোমাৰ খাদ্য খালোঁ। মই সোনকালেই চাকৰি এৰি দিম।’’ তেওঁ চিঠিখনৰ শেষত ডেমিয়েনক আশীৰ্বাদো প্ৰদান কৰিছে।
গোটেই কাণ্ডটোত ডেমিয়েন ক্ষুব্ধ হৈ পৰিছিল। কিন্তু নেটিজেনসকলৰ মাজৰ বহুতেই ফুড ডেলিভাৰী বয়জনৰ প্ৰতি সহানুভূতি প্ৰকাশ কৰিছিল। বহুতে কৈছে যে মানুহে খাদ্য যোগাৰ কৰিবলৈ কি কি যে কৰিব লগা হয়। বহুতে ফুড ডেলিভাৰী বয়জনে নিজৰ কাম ভালদৰে নকৰা বাবে ক্ষোভ প্ৰকাশো কৰিছে।
এই ঘটনা বৰ্তমান ছ’চিয়েল মিডিয়াত ভাইৰেল হৈ পৰিছে।
Continue Reading
