ডিজিটেল ডেস্কঃ ভাৰতক যিমানেই ডিজিটেল কৰাৰ প্ৰচেষ্টা চলিছে সিমানেই ইটোৰ পিছত সিটোকৈ অন্ধ বিশ্বাসৰ ঘটনা পোহৰলৈ আহিছে। শেহতীয়াকৈ ওড়িশাৰ 'হো' জনজাতীয় সম্প্ৰদায়ৰ দুটি নাবালকক অন্ধ বিশ্বাসৰ বশৱৰ্তী হৈয়েই কুকুৰৰ সৈতে বিয়া দিয়া হৈছে। জনগোষ্ঠীটোৰ লোসকলে বিশ্বাস কৰে যে শিশুৰ প্ৰথমে গজা দাঁতটো অশুভ। অশুভ আত্মাৰ পৰা ৰক্ষা পৰিবলৈ তেওঁলোকে তেওঁলোকৰ সন্তানক কুকুৰৰ সৈতে বিয়া দিয়ে।
শিশুসকলক অশুভ আত্মাৰ পৰা সুৰক্ষিত কৰিবলৈ কুকুৰৰ সৈতে বিয়া দিয়াৰ পৰম্পৰা আজিও চলি আছে।উৰিষ্যাৰ বালাচোৰত দুটিকৈ নাবালক শিশুক পথৰ কুকুৰৰ সৈতে বিয়া কৰাই দিয়াৰ ঘটনাই আলোড়ণৰ সৃষ্টি কৰিছে।কুকুৰৰ সৈতে বিয়া দিয়া শিশু দুটিৰ বয়স তেনেই কম। মাত্ৰ ১১ বছৰ বয়সৰ দাৰী সিঙৰ পুত্ৰ তপন সিঙক এটা মাইকী কুকুৰৰ সৈতে বিয়া দিয়া হৈছে। একেদৰে ৭ বছৰীয়া লক্ষ্মীক এটা মতা কুকুৰৰ সৈতে বিয়া কৰাই দিয়া হৈছে।
উৰিষ্যাৰ 'ছিং' বন্ধচাহী গাঁৱৰ 'হো' জনজাতীয় লোকসকলৰ মাজত কুকুৰৰ সৈতে বিয়া দিয়াৰ পৰম্পৰা আছে। যেতিয়াই শিশু দুটিৰ প্ৰথম দাঁতটো গজিছিল তেতিয়াই তেওঁলোকৰ বিবাহৰ বাবে পথৰ কুকুৰ বিচাৰিবলৈ আৰম্ভ কৰা হৈছিল।
গাওঁখনৰ পৰা স্নাতক হোৱা ২৮ বছৰীয়া সাগৰ সিঙে কয় যে সম্প্ৰদায়টোৰ পৰম্পৰা অনুসৰি দুটা নাবালক সন্তানক কুকুৰৰ সৈতে বিয়া দিয়া হৈছে আৰু সেই উপলক্ষ্যে ৰাজহুৱা ভোজৰো আয়োজন কৰা হৈছিল। পুৱা ৭ বজাৰ পৰা দুপৰীয়া ১ বজালৈ বিবাহৰ ৰীতি-নীতি অব্যাহত আছিল। সাগৰে কয় যে সম্প্ৰদায়টোৱে বিশ্বাস কৰে যে কুকুৰৰ সৈতে "বিয়া" হোৱাৰ পিছত যি বেয়া ঘটিবলগীয়া আছিল সেয়া শিশুৰ পৰা কুকুৰলৈ যাব। যদিও ইয়াৰ কোনো বৈজ্ঞানিক ভিত্তি নাই, এই বিশ্বাসেই তাত দীৰ্ঘদিন ধৰি চলি আহিছে।
পূৰ্বেও বালাচোৰত কুকুৰৰ সৈতে শিশুৰ বিয়া হোৱাৰ ঘটনা ঘটিছে।
Continue Reading
