ডিজিটেল ডেস্কঃ দিন বাগৰাৰ লগে লগে ডিজিটেল হৈ পৰিছে ভাৰত৷ সেই ডিজিটাইলেজনৰ প্ৰভাৱ যেন এতিয়া বান্দৰৰ ওপৰতো পৰিছে৷ মোবাইল ফোন এতিয়া নৱ প্ৰজন্মৰ বহুতৰে বাবে বুকুৰ কুটুম হৈ পৰিছে৷ কেৱল মানুহেই মোবাইল ফোনৰ দ্বাৰা আকৰ্ষিত হোৱা নাই, বান্দৰকো আকৰ্ষণ কৰিছে মোবাইল ফোনে৷
শেহতীয়াকৈ কেন্দ্ৰীয় আইন মন্ত্ৰী কিৰেন ৰিজিজুৱে এটা বিশেষ ভিডিঅ’ শ্বেয়াৰ কৰিছে। ভিডিঅ’টোত তেওঁ এটা শিৰোনামো দিছে৷ কিৰেন ৰিজিজুৱে টুইটাৰত ভিডিঅ'টো শ্বেয়াৰ কৰিছে৷ ভিডিঅ'টোত কমেও পাঁচটা বান্দৰ দেখা গৈছে। বান্দৰ কেইটাই মনোযোগেৰে মোবাইল ফোনৰ ভিডিঅ’ চাই থকা দেখা গৈছে৷ এনে লাগে যেন বান্দৰ কেইটাও মোবাইলৰ প্ৰতি আসক্ত হৈ পৰিছে। কেন্দ্ৰীয় আইন মন্ত্ৰী আৰু বিজেপি নেতাৰ কৌতুকেৰে ভৰা শিৰোনামটোৱে বহু লোকৰ দৃষ্টি আকৰ্ষণ কৰিছে। ৰিজিজুৱে লিখিছে, "ডিজিটেল ভাৰতৰ সাক্ষৰতাৰ হাৰ কেনে স্তৰত উপনীত হৈছে চাওক, অবিশ্বাস্য!"
ভিডিঅ'টো ভাৰতত দৃশ্যগ্ৰহণ কৰা হৈছিল নে নাই তাকে লৈ সন্দেহ আছে। অৱশ্যে ৰিজিজুৰ মন্তব্যই নেটিজেনসকলৰ মাজত মিশ্ৰিত প্ৰতিক্ৰিয়াৰ সৃষ্টি কৰিছে। কোনোবাই হাঁহিৰ ইমোজিৰে বিষয়টো উপভোগ কৰিছে। কিছুমানে প্ৰতিক্ৰিয়া প্ৰকাশ কৰাৰ নামত উপহাসো কৰিছে। কেন্দ্ৰীয় আইন মন্ত্ৰীৰ পোষ্টত এজনে লিখিছিল, "শিশুৱে পঢ়িব পৰা নাই, গতিকে এইবাৰ বান্দৰবোৰে পঢ়িব।" যিকিনহওঁক, পোষ্টটোৱে বহুতকে আমোদ দিছে৷
Continue Reading
