ডিজিটেল ডেস্কঃ আজিকালি মৃত্যু যেন তেনেই সহজ হৈ পৰিছে। বিশেষকৈ কম বয়সীয়া মানুহৰ সঘন মৃত্যুৱে মানুহক ভীতিগ্ৰস্ত কৰি তুলিছে। খাওতে, শোওতে, ব্যায়াম কৰি থাকোতে, খোজ কাঢ়ি থাকোতেই মানুহে আজিকালি সাবটি লয় মৃত্যু। শেহতীয়াকৈ এগৰাকী অষ্টম শ্ৰেণীৰ ছাত্ৰীৰ আকস্মিক মৃত্যুৱে সকলোকে কন্দুৱাইছে। বিদ্যালয়ৰ প্ৰাৰ্থনা সভাত অংশগ্ৰহণৰ পিছত অন্য সহপাঠীৰ সৈতে নিজৰ শ্ৰেণীকোঠাত সোমাইছিল অষ্টম শ্ৰেণীৰ ছাত্ৰী ৰিয়া ছনী। কিন্তু কোনেও সপোনতো ভবা নাছিল যে সেয়াই আছিল ছাত্ৰীগৰাকীৰ জীৱনৰ অন্তিম ক্ষণ।
শ্ৰেণীকোঠাত প্ৰৱেশ কৰাৰ কিছুসময় পাছতে হঠাৎ অচেতন হৈ ঢলি পৰে অষ্টম শ্ৰেণীৰ মেধাৱী ছাত্ৰীগৰাকী। এই ঘটনাত শ্ৰেণীকোঠাটোত হুৱাদুৱা লাগে। লগে লগে বিদ্যালয় কৰ্তৃপক্ষই ৰিয়া ছনীক হাস্পতাললৈ লৈ যায় যদিও ছাত্ৰীগৰাকীৰ মৃত্যু ঘটা বুলি ঘোষণা কৰে চিকিৎসকে। হাৰ্ট এটেক হৈয়ে ৰিয়াৰ মৃত্যু হোৱা বুলি জনায় চিকিৎসকৰ দলে।
এই হৃদয় বিদাৰক ঘটনা সংঘটিত হৈছে গুজৰাটৰ ৰাজকোটৰ জাছানী স্কুলত। প্ৰচণ্ড জাৰৰ বাবেই ৰিয়া সংজ্ঞাহীন হৈ পৰি হৃদক্ৰিয়া বন্ধ হৈ মৃত্যুক আঁকোৱালি লোৱা বুলি অভিযোগ কৰিছে পৰিয়ালে। অন্যহাতে এই ঘটনাক গুৰুত্বসহকাৰে লৈ পুৱাই শিক্ষা বিভাগৰ জ্যেষ্ঠ বিষয়াৰ সৈতে এক বৈঠকত মিলিত হয় গুজৰাটৰ শিক্ষামন্ত্ৰী।
এই বৈঠকৰ পিছতে জাছানী স্কুলৰ পৰা ছাত্ৰীগৰাকীৰ মৃত্যু সন্দৰ্ভত প্ৰতিবেদন বিচাৰে চৰকাৰে। উল্লেখযোগ্য যে দেশত ইটোৰ পাছত সিটোকৈ বৃদ্ধি পাইছে হাৰ্ট এটেকত আক্ৰান্ত হৈ আকস্মিক মৃত্যুক সাবটি লোৱা ঘটনা।
Continue Reading
