দিল্লী উচ্চ ন্যায়ালয়ৰ জামিন স্থগিতাদেশৰ আদেশক প্ৰত্যাহ্বান জনোৱা আবেদন প্ৰত্যাহাৰ কৰিলে কেজৰিৱালে, নতুনকৈ কৰিব লাগিব আবেদন

সিংভীয়ে  কয় যে ২০ জুনত বিচাৰ আদালতে গৃহীত কৰা জামিন আদেশৰ বিৰুদ্ধে ২১ জুনত দিল্লী উচ্চ ন্যায়ালয়ে সেই আদেশত অন্তৱৰ্তীকালীন স্থগিতাদেশ জাৰি কৰিছিল। এতিয়া ঘটনাৰ পৰৱৰ্তী উন্নয়ন ঘটিছে  আৰু কেজৰিৱালক দিল্লী আবকাৰী নীতিৰ গোচৰৰ সৈতে জড়িত কৰি  কেন্দ্ৰীয় তদন্ত ব্যুৰোৱে (চিবিআই) গ্ৰেপ্তাৰ কৰিছে। সেয়ে সকলো প্ৰক্ৰিয়া এতিয়া নতুনকৈ আৰম্ভ কৰিব লাগিব।  চিবিআইৰ গ্ৰেপ্তাৰৰ সৈতে জড়িত শেহতীয়া পৰিঘটনাৰ কথা উল্লেখ কৰি তেওঁ কয়, ‘প্ৰতিদিনে আমাক বিভিন্ন  পৰিঘটনাই বেৰি ধৰিছে। ২০২২ চনত শেষবাৰৰ বাবে চিবিআইয়ে  কেজৰিৱালক  জেৰা কৰা গোচৰটোত এতিয়া  তেওঁক  গ্ৰেপ্তাৰ কৰা হৈছে।’ আদালতত ইডিৰ হৈ হাজিৰ থকা অতিৰিক্ত অধিবক্তা  জেনেৰেল (এ এছ জি) এছ ভি ৰাজুৱে আঙুলিয়াই দিয়ে যে আবেদনকাৰীয়ে ২৫ জুনৰ আদেশকহে প্ৰত্যাহ্বান জনাব পাৰে,  কাৰণ ২১ জুনৰ আদেশক প্ৰত্যাহ্বান জনোৱাটোৱে ২৫ জুনৰ আদেশক নুবুজায়। 

অৱশ্যে আবেদনখন প্ৰত্যাহাৰ কৰাত ৰাজুৱে কোনো আপত্তি নদৰ্শায় । ইয়াৰ পিছতে আবেদনখন প্ৰত্যাহাৰ কৰিবলৈ অনুমতি দিয়া হৈছে বুলি আদালতে কয়।  ফলত কেজৰিৱালে বৰ্তমানৰ আবেদনখনত সন্নিৱিষ্ট একেবোৰ প্ৰাৰ্থনা আওৰাই নতুনকৈ আবেদন দাখিল কৰিব লাগিব। উল্লেখ্য মঙলবাৰে বিয়লি দিল্লী উচ্চ ন্যায়ালয়ে সুৰা নীতিৰ অভিযোগত গ্ৰেপ্তাৰ হোৱা দিল্লীৰ মুখ্যমন্ত্ৰী অৰবিন্দ কেজৰিৱালৰ জামিন নাকচ কৰিছিল।  উচ্চ ন্যায়ালয়ে যুক্তি দিছিল যে নিম্ন আদালত - অৰ্থাৎ দিল্লীৰ ৰাউজ এভিনিউ আদালতে - জামিন প্ৰদান কৰাৰ সময়ত "নিজৰ বিবেক-বুদ্ধি ব্যৱহাৰ কৰা নাছিল" আৰু সেই  ৰায়দান ভুল আছিল। উল্লেখ ইডিয়ে  মাৰ্চ মাহত সুৰা নীতিৰ গোচৰৰ সৈতে জড়িত আপ নেতাজনক গ্ৰেপ্তাৰ কৰিছিল। কেজৰিৱালক ৰাউজ এভিনিউ আদালতে জামিন দিছিল যদিও  কেজৰিৱালৰ মুক্তিৰ ওপৰত অন্তৱৰ্তীকালীন স্থগিতাদেশৰ নিৰ্দেশ দিছিল দিল্লী উচ্চ ন্যায়ালয়ে।