ডিজিটেল ডেস্কঃ দিল্লী টেষ্টত অষ্ট্ৰেলিয়াক দূৰ্দান্তভাৱে পৰাস্ত কৰি ভাৰতীয় ক্ৰিকেট দলে শৃংখলা জয় কৰিলে। কেৱল শৃংখলা জয়েই নহয়, কেইবাটাও অভিলেখো গঢ়িবলৈ সক্ষম হ’ল ৰোহিত শৰ্মা, বিৰাট কোহলীহঁতে।
টেষ্টখনত জয়ী হৈ অষ্ট্ৰেলিয়াৰ বিৰুদ্ধে সৰ্বাধিকবাৰ টেষ্ট মেচত জয়লাভ কৰাৰ কীৰ্তি গঢ়ে টীম ইণ্ডিয়াই। দিল্লীৰ এই জয় আছিল অষ্ট্ৰেলিয়াৰ বিৰুদ্ধে ভাৰতৰ ৩২ সংখ্যক টেষ্ট জয়। ভাৰতে আন কোনো দেশৰ বিৰুদ্ধে ইমান টেষ্ট মেচত জয়ী হোৱা নাই।
১৯৪৭ চনত ভাৰত আৰু অষ্ট্ৰেলিয়াই প্ৰথমবাৰৰ বাবে টেষ্ট মেচত মুখামুখি হৈছিল। এই পৰ্যন্ত ১০৪খন টেষ্টত দুয়োখন দেশৰ মুখামুখি হৈছে। দিল্লীত অনুষ্ঠিত ৩২ সংখ্যক টেষ্টত ভাৰতে জয়লাভ কৰে। অষ্ট্ৰেলিয়াই ৪৩খন টেষ্টত জয়লাভ কৰিছে। দুয়োখন দেশৰ মাজত ২৮খন টেষ্ট ড্ৰ’ত সমাপ্ত হয়। এখন টেষ্ট টাই হয়।
ঘৰুৱা খেলপথাৰত অষ্ট্ৰেলিয়াক ২২খন মেচত পৰাস্ত কৰিলে ভাৰতে। অষ্ট্ৰেলিয়াৰ মাটিত ৯খন মেচত জয়ী হৈছে টীম ইণ্ডিয়া। আনহাতে অষ্ট্ৰেলিয়াই ঘৰুৱা মাটিত ভাৰতৰ বিৰুদ্ধে ৩০খন খেলত জয়লাভ কৰিছে। ভাৰতৰ মাটিত ১৩খন মেচত জয়লাভ কৰিছে।
ইয়াৰ আগলৈকে ভাৰতৰ সৰ্বাধিক টেষ্ট জয় হৈছে ইংলেণ্ডৰ বিৰুদ্ধে। ৩১ খন টেষ্ট মেচত জয়লাভ কৰিছিল ভাৰতে। ১৯৩২ চনত প্ৰথমবাৰৰ বাবে ভাৰত আৰু ইংলেণ্ডৰ মাজত টেষ্ট মেচত মুখামুখি হৈছিল। এই পৰ্যন্ত দুয়োটা দলে ১৩১ খন টেষ্ট খেলিছে। ইংলেণ্ডৰ পিছতে শ্ৰীলংকা, ৱেষ্ট ইণ্ডিজ আৰু নিউজিলেণ্ড যৌথভাৱে তৃতীয় স্থানত আছে। এই তিনিখন দেশৰ বিৰুদ্ধে এতিয়ালৈকে ভাৰতে ২২খন টেষ্ট মেচত জয়লাভ কৰিছে।
Continue Reading
