ডিজিটেল ডেস্কঃ শেহতীয়াকৈ বলীউডৰ অভিনেত্ৰী ৰশ্মিকা মাণ্ডান্নাৰ ডিপফেক ভিডিঅ’ ভাইৰেল হৈছিল। ইয়াৰ পাছতে ৰশ্মিকা মাণ্ডান্নাই এজাহাৰ দাখিল কৰিছিল। একে সময়তে এতিয়া ভাৰতীয় প্ৰাক্তন ক্ৰিকেটাৰ শচীন তেণ্ডুলকাৰ ডিপফেক ভিডিঅ’ৰ বলি হৈছে। মাষ্টাৰ ব্লাষ্টাৰে নিজেই ছ’চিয়েল মিডিয়াত পোষ্ট কৰি সমগ্ৰ বিষয়টো বুজাই দিয়ে। শচীন তেণ্ডুলকাৰে তেওঁৰ পোষ্টত লিখিছে যে এই ভিডিঅ’টোত ডিপফেক প্ৰযুক্তি ব্যৱহাৰ কৰা হৈছে আৰু তেওঁক এটা এপৰ প্ৰচাৰ কৰা দেখা গৈছে।
শচীন টেণ্ডুলকাৰে এক্সত লিখিছে যে “এই ভিডিঅ'টো ভুৱা, আপোনালোকক প্ৰতাৰণা কৰিবলৈ বনোৱা হৈছে।” তেণ্ডুলকাৰে আৰু লিখিছে যে “ডিপফেকৰ অপব্যৱহাৰ সঠিক নহয়। আপোনালোক সকলোকে এনে ভিডিঅ বা এপ বা বিজ্ঞাপন দেখিলে অতি সোনকালে ৰিপৰ্ট কৰিবলৈ অনুৰোধ জনোৱা হ'ল। ছ’চিয়েল মিডিয়া প্লেটফৰ্মতো সাৱধান হ’ব লাগে। সংশ্লিষ্ট ব্যক্তিজনৰ বিৰুদ্ধে অতি সোনকালে ব্যৱস্থা গ্ৰহণ কৰিব লাগে।” ইয়াৰ লগতে মাষ্টাৰ ব্লাষ্টাৰে ইলেক্ট্ৰনিকছ, আই টি মন্ত্ৰালয় আৰু এই মন্ত্ৰালয়ৰ কেন্দ্ৰীয় ৰাজ্যিক মন্ত্ৰী ৰাজীৱ চন্দ্ৰশেখৰকো এই সন্দৰ্ভত ব্যৱস্থা গ্ৰহণ কৰিবলৈ আহ্বান জনায়।
ছচিয়েল মিডিয়াত ভাইৰেল হোৱা ডিপফেক ভিডিঅ’টোত শচীন টেণ্ডুলকাৰে কোৱা দেখা গৈছে যে তেওঁৰ কন্যাই অনলাইন গেম এভিয়েটৰ খেলে আৰু ইয়াৰ পৰা ১৮০ হাজাৰ টকা উপাৰ্জন কৰি আছে।
উল্লেখ্য যে, ডিপফেকে কৃত্ৰিম বুদ্ধিমত্তা (AI) ব্যৱহাৰ কৰে। এই কৌশলৰ জৰিয়তে যিকোনো ব্যক্তিৰ ভুৱা ছবি সহজে তৈয়াৰ কৰিব পৰা যায়। লগতে ডিপ লাৰ্নিং, এক প্ৰকাৰৰ এআই, যিকোনো ছবি, অডিঅ’ বা ভিডিঅ’ক ভুৱা বুলি দেখুৱাবলৈ ইয়াত ব্যৱহাৰ কৰা হয়। সেয়েহে ইয়াক ডিপফেক টেকন’লজি বুলি কোৱা হয়।
Continue Reading
