ডক্তৰ বেজবৰুৱা ২; বৰলুইতৰ পাৰত মুকলি ‘কি নাম দি মাতিম’

ডিজিটেল ডেস্ক; অসমীয়া চিনেমাক নতুন গতি দিয়া ব্ৰজেন বৰুৱা পৰিচালিত ‘ডক্তৰ বেজবৰুৱা’ৰ Remake ‘ডক্তৰ বেজবৰুৱা ২’ক লৈ আগ্ৰহ বৃদ্ধি পাইছে অসমবাসীৰ৷ নৱবৰ্ষৰ প্ৰাৰম্ভতে মুক্তি লাভ কৰিব বহুপ্ৰতীক্ষিত ‘ডক্তৰ বেজবৰুৱা ২’য়ে৷

ড° সঞ্জীৱ নাৰায়ণ আৰু ডাঃ অক্ষতা নাৰায়ণ প্ৰযোজিত আৰু নিপন গোস্বামী পৰিচালিত এই কথাছবিখনৰ দুটি গীতে ইতিমধ্যে হৃদয় জিনিছে শ্ৰোতা-দৰ্শকৰ৷ ১৮ নৱেম্বৰত জুবিন গাৰ্গৰ জন্মদিনৰ সৈতে সংগতি ৰাখি যোৰহাটত ছবিখনৰ এটি আকৰ্ষণীয় গীত ‘জিলিকি জিলিকা তৰা আকাশৰে’ মুক্তি দিয়া হয়৷ 

জিলিকি জিলিকাৰ অভূতপূৰ্ব সমাদৰ আৰু সফলতাৰ পাছত আজি ছবিখনৰ দ্বিতীয়টো গীত ‘কি নাম দি মাতিম’ আনুষ্ঠানিকভাৱে শ্ৰোতাৰ বাবে মুকলি কৰি দিয়া হয়৷ গীতিকাৰ দিগন্ত ভাৰতীৰ নৱ সংযোজিত কথাৰে নৱনিৰ্মিত জনপ্ৰিয় গীতটোত কণ্ঠদান কৰিছে জুবিন গাৰ্গ আৰু ভাস্বতী ভাৰতীয়ে৷ 

অৰ্ধশতিকাৰো অধিক কাল অসমীয়া শ্ৰোতা-দৰ্শকৰ প্ৰাণ উজ্জীৱিত কৰি ৰখা কি নাম দি মাতিমৰ নৱতম সংস্কৰণটোক অসমবাসীয়ে আদৰি ল’ব বুলি আশা প্ৰকাশ কৰে ছবিখনৰ প্ৰযোজক ড° সঞ্জীৱ নাৰায়ণে৷ আজি আবেলি গুৱাহাটীৰ বৰলুইতৰ পাৰত ব্ৰহ্মপুত্ৰ হেৰিটেজ চেণ্টাৰত অনুষ্ঠিত এক অনুষ্ঠানত এই গীতটো আনুষ্ঠানিকভাৱে মুকলি কৰা হয়৷

লগতে, বিশিষ্ট অভিনেতা নিপন গোস্বামীৰ প্ৰতি শ্ৰদ্ধাৰ্ঘ্য নিৱেদনৰ অৰ্থে আজি অসমৰ দহটা অঞ্চলত বৰলুইতৰ পাৰত পাৰ চৰাই মুকলি কৰি দিয়া হয়৷ ‘ডক্তৰ বেজবৰুৱা ২’ক অসমবাসীয়ে আদৰি ল’ব বুলি আশা প্ৰকাশ কৰিছে ছবিখনৰ অন্যতম প্ৰযোজক ডাঃ অক্ষতা নাৰায়ণে৷

অসমৰ প্ৰথমখন থ্ৰীলাৰ আৰু বাণিজ্যিকভাৱে সফল ছবি ‘ডক্তৰ বেজবৰুৱা’ৰ মুক্তিৰ পঞ্চাশ বছৰ পাছত নিৰ্মাণ কৰা হৈছে ছবিখনৰ ৰীমেক ‘ডক্তৰ বেজবৰুৱা ২’৷ য’ত অভিনয় কৰিছে নিপন গোস্বামীৰ তনয় সিদ্ধাৰ্থ গোস্বামী, কিংকিনী গোস্বামী, আন্তৰ্জাতিক খ্যাতিসম্পন্ন অভিনেতা আদিল হুছেইন, নিপন গোস্বামীকে ধৰি ভালেসংখ্যক অভিনেতা-অভিনেত্ৰীয়ে৷ আজিৰে পৰা কি নাম দি মাতিম গীতটো ‘Saregama Regional’ ইউটিউব চেনেলত উপলব্ধ হৈছে৷ 

আজি ‘কি নাম দি মাতিম’ শীৰ্ষক গীতটোৰ উন্মোচনী অনুষ্ঠানত প্ৰযোজকদ্বয়ৰ লগতে অভিনেতা সিদ্ধাৰ্থ গোস্বামী, কিংকিনী গোস্বামী, সদানন্দ গগৈ আৰু চলচ্চিত্ৰখনৰ কলা-কুশলীৰ লগতে সাংস্কৃতিক জগতৰ বহু বিশিষ্ট ব্যক্তি৷