ডিজিটেল ডেস্কঃ পাকিস্তানত সংঘটিত হৈছে এক শোকাবহ দুৰ্ঘটনা। দলঙৰ পৰা এখন যাত্ৰীবাহী বাছ নদীত পৰি যোৱাৰ ফলত কমেও ৩৯ জন যাত্ৰী নিহত হৈছে। এই ঘটনাত কেইবাজনো লোক আহত হৈছে। ঘটনাটো শনিবাৰে মাজনিশা পাকিস্তানৰ বেলুচিস্তানৰ লাচবেলাত সংঘটিত হোৱাৰ খবৰ পোৱা গৈছে।
দ্য ডনত প্ৰকাশিত প্ৰতিবেদন অনুসৰি বাছখনে ৪৮ জন যাত্ৰী কঢ়িয়াই কোৱেটা প্ৰদেশৰ পৰা কৰাচীলৈ গৈ আছিল। লাচবেলাৰ ওচৰৰ এখন নদীৰ দলঙৰ ওপৰত উঠাৰ পিছতে চালকজনে নিয়ন্ত্ৰণ হেৰুৱাই পেলায় ।ফলত বাছখনে দলঙৰ ৰেলিং ভাঙি নদীৰ পানীত পৰি যায়। নৈত পৰি যোৱাৰ সময়তে বাছখনত জুই লাগিছিল। অগ্নিদগ্ধ হৈয়েই বেছিভাগ যাত্ৰীৰ মৃত্যু ঘটা বুলি লাচবেলাৰ সহকাৰী আয়ুক্ত হামজা অঞ্জুমে প্ৰকাশ কৰিছে।
আৰক্ষীয়ে প্ৰকাশ কৰা মতে ঘটনাটো স্থানীয় সময় অনুসৰি পুৱা প্ৰায় ২.১৫ বজাত সংঘটিত হৈছে। এটা শিশুসহ তিনিজন লোকক জীৱিত অৱস্থাত উদ্ধাৰ কৰা হৈছে। দেওবাৰে পুৱালৈকে ১৭ টা দগ্ধ মৃতদেহ উদ্ধাৰ কৰা হৈছে। পিছত আৰু কেইবাটাও মৃতদেহ উদ্ধাৰ কৰা হৈছে। স্থানীয় প্ৰশাসনৰ দ্বাৰা মুঠ ৩৯জন লোকৰ মৃত্যু ঘটা বুলি নিশ্চিত কৰা হৈছে। ঘটনাটোৰ পৰা বাচি যোৱা সকলৰ বহুতে গুৰুতৰভাৱে আঘাতপ্ৰাপ্ত হৈছিল। ফলস্বৰূপে আৰক্ষীয়ে আশংকা কৰিছে যে মৃত্যুৰ সংখ্যা আৰু বৃদ্ধি পাব পাৰে।
Continue Reading
