ডিজিটেল ডেস্কঃ দোকানলৈ সামগ্ৰী কিনিবলৈ যোৱা এগৰাকী মহিলা দলবদ্ধ ধৰ্ষণৰ বলি হয়। এক গেংষ্টাৰৰ গোচৰত জেলত আছে মহিলাগৰাকীৰ স্বামী। উত্তৰ প্ৰদেশৰ কানপুৰত ঘটিছে এই ঘটনা।
মহিলাগৰাকীৰ অভিযোগ অনুসৰি যোৱা ৪ এপ্ৰিলৰ নিশা গাঁৱৰ দোকানী প্ৰদীপৰ ওচৰলৈ মছলা কিনিবলৈ গৈছিল। ইতিমধ্যে তাত অৰুণ নামৰ যুৱক এজন উপস্থিত আছিল। দুয়োজনে এক অজুহাতত দোকানৰ ভিতৰলৈ মহিলাগৰাকীক মাতিলে।
ইয়াৰ পিছতে শ্বাটাৰ তললৈ টানি দোকানৰ ভিতৰতে আবদ্ধ কৰি দিয়া হয় মহিলাগৰাকীক। প্ৰদীপ আৰু অৰুণে মহিলাগৰাকীক ধৰ্ষণ কৰে। যেতিয়া মহিলাগৰাকীয়ে ইয়াৰ বিৰুদ্ধে প্ৰতিবাদ সাব্যস্ত কৰে তেতিয়া অভিযুক্তই এই বিষয়ে কাৰোবাক ক’লে হত্যা কৰাৰ ভাবুকি দিয়ে।
মহিলাগৰাকীয়ে কান্দি কান্দি কয় যে ''যেতিয়া মোৰ স্বামী জে’লৰ পৰা মুক্তি পাব তেতিয়া মই তেওঁক সকলো ক’ম। যেতিয়া তেওঁ এই ঘটনাৰ বিষয়ে জানিব পাৰিব, তেতিয়া তেওঁ তোমালোকক শুদাই নেৰে।'' তেতিয়া প্ৰদীপ আৰু অৰুণে মহিলাগৰাকীক ভাবুকি দি কয় – ''আপোনাৰ স্বামী যেতিয়া জেলৰ পৰা ওলাই আহিব তেতিয়ালৈকে আপুনি এই পৃথিৱীৰ পৰাই নাইকিয়া হৈ যাব।''
আৰক্ষীক দিয়া অভিযোগত মহিলাগৰাকীয়ে কয় যে ''প্ৰদীপে মোক দোকানৰ ভিতৰলৈ টানি আনি শ্বাটাৰ বন্ধ কৰি দিছিল। ইয়াৰ পাছত অৰুণ আৰু প্ৰদীপে একেলগে মোক ধৰ্ষণ কৰিলে। মই অকলে আছিলো আৰু তেওঁলোক দুজন আছিল, গতিকে মই একো কৰিব পৰা নাছিলো।'' ঘটনাৰ পাছতে মহিলাগৰাকীয়ে থানালৈ গৈ আৰক্ষীক অভিযোগ দাখিল কৰে।
এই ক্ষেত্ৰত এডিচিপি বিজন দ্বিবেদীয়ে কয় যে মহিলাগৰাকীৰ অভিযোগৰ ভিত্তিত গোচৰ পঞ্জীয়ন কৰা হৈছে। এই গোচৰত ব্যৱস্থা গ্ৰহণ কৰি আৰক্ষীয়ে দুয়োজন অভিযুক্তক গ্ৰেপ্তাৰ কৰিছে। দুয়োজন অভিযুক্তক জেৰা কৰা হৈছে। এই সন্দৰ্ভত আৰক্ষীয়ে তদন্ত অব্যাহত ৰাখিছে। অভিযুক্তৰ বিৰুদ্ধে কঠোৰ ব্যৱস্থা গ্ৰহণ কৰা হ’ব।
Continue Reading
