ডিজিটেল ডেস্কঃ আদানি গ্ৰুপৰ শ্বেয়াৰ বজাৰ এতিয়া ক্ৰমে ডুবিবলৈ লৈছে। এনে সময়তে এলআইচিত ধন জমা কৰা গ্ৰাহক সকলৰ মনতো শংকা বৃদ্ধি পাইছে। কাৰণ আদানী গ্ৰুপে এলআইচিৰ পৰা প্ৰচুৰ পৰিমাণৰ ধন ধাৰলৈ লৈ থৈছে। যদি আদানীৰ ব্যৱসায় স্থৱিৰ হৈ পৰে তেন্তে এলআইচি গ্ৰাহকসকলৰ ধন ঘূৰাই পোৱাৰ আশাও মাৰ যাব নেকি?
এনে প্ৰশ্নই এতিয়া খেলাই আছে এলআইচিৰ গ্ৰাহকসকৰ মনত। এনে আশংকাৰ মাজতে এলআইচিয়ে এক বিবৃতি প্ৰকাশ কৰিছে। বিবৃতিটোত কোৱা হৈছে যে আদানী গ্ৰুপৰ কোম্পানীবোৰত এলআইচিৰ বেছি বিনিয়োগ নাই, সেয়ে বিপদাশংকাও কম। ভাৰতীয় জীৱন বীমা নিগমে আজি জাৰি কৰা বিবৃতিটোত কোৱা হৈছে যে "৩১ ডিচেম্বৰ, ২০২২ তাৰিখে আদানি গ্ৰুপ অৱ কোম্পানীৰ অধীনত ইকুইটি আৰু ঋণৰ অধীনত এলআইচিৰ মুঠ ধনৰ পৰিমাণ হৈছে ৩৫,৯১৭.৩১ কোটি টকা। আদানি গ্ৰুপৰ সকলো কোম্পানীৰ অধীনত যোৱা কেইবা বছৰত ক্ৰয় কৰা ইকুইটিৰ মুঠ ক্ৰয় মূল্য হৈছে ৩০,১২৭ কোটি টকা। ২৭ জানুৱাৰী, ২০২২ তাৰিখলৈকে বজাৰ বন্ধ হোৱাৰ সময়ত মুঠ শ্বেয়াৰৰ মূল্য আছিল ৫৬,১৪২ কোটি টকা। আদানি গোটৰ অধীনত এতিয়ালৈকে বিনিয়োগ কৰা মুঠ পৰিমাণ হৈছে ৩৬,৪৭৪.৭৮ কোটি টকা। এই বিনিয়োগবোৰ এক নিৰ্দিষ্ট সময়ৰ ভিতৰত কৰা হৈছে। এল.আই.চি.-ৰ দ্বাৰা কৰা আদানি গ্ৰুপৰ সকলো ঋণ চিকিউৰিটিৰ ক্ৰেডিট ৰেটিং এ.এ. আছে। এইটো সকলো আইআৰডিএআইৰ দ্বাৰা নিৰ্ধাৰিত বীমা কোম্পানীবোৰৰ বিনিয়োগৰ নিয়মৰ সৈতে সামঞ্জস্যপূৰ্ণ। ৩০ ছেপ্টেম্বৰ, ২০২২ তাৰিখলৈকে, এল.আই.চি.-ৰ মুঠ সম্পত্তি (এইউ.এম.) আছিল ৪১.৬৬ লাখ কোটি টকাৰো অধিক। সেই আকলন অনুসৰি, আদানি গোটৰ সৈতে লেনদেন হৈছে মুঠ এ.ইউ.এম.-ৰ ০.৯৭৫%।’’
উল্লেখ্য আদানি গোটে ঋণ ল'বলৈ কোম্পানীৰ শ্বেয়াৰ ব্যৱহাৰ কৰিছে। ফলস্বৰূপে যদি ঋণ ডিফল্ট হয় কোম্পানীবোৰ ক্ষতিগ্ৰস্ত হ'ব পাৰে বুলি আশংকা সৃষ্টি হৈছে। আমেৰিকাযুক্ত প্ৰতিষ্ঠান হিণ্ডেনবাৰ্গ ৰিচাৰ্ছৰ প্ৰতিবেদন বুধবাৰে প্ৰকাশ কৰা হৈছিল। ইয়াৰ পিছতে আদানি গোটৰ বিভিন্ন কোম্পানীৰ শ্বেয়াৰৰ মূল্য হ্ৰাস পাইছে।
Continue Reading
