ডিজিটেল ডেস্কঃ ভাৰতীয় দলৰ সৈতে নিউয়ৰ্কলৈ উৰা মাৰিছিল টি-২০ বিশ্বকাপ খেলিবলৈ। কিন্তু ২০২২ চনৰ ডিচেম্বৰ মাহৰ সেই নিশা সংঘটিত হোৱা ভয়ানক গাড়ী দুৰ্ঘটনাৰ ভয়ৰ পৰা ঋষভ পণ্টে তেতিয়াও মুক্ত হ’ব পৰা নাছিল।
ভাৰতীয় উইকেটকীপাৰ বেটছমেনগৰাকীয়ে ৰাষ্ট্ৰীয় দলৰ একালৰ সতীৰ্থ শিখৰ ধাৱনৰ সৈতে হোৱা বাৰ্তালাপত এই কথা প্ৰকাশ কৰে- ‘‘সেই দুৰ্ঘটনাটোৱে মোৰ জীৱনটো ৰাতিটোৰ ভিতৰতে সলনি কৰি দিলে। ঘটনাটোৰ পিছত মই জীয়াই থাকিম নে নাই গম পোৱা নাছিলো। কিন্তু ঈশ্বৰে মোক ৰক্ষা কৰিলে।”
তাতে ৰৈ নোযোৱাকৈয়ে ঋষভেও ক'লে, "সেই দুৰ্ঘটনাৰ পিছত মোৰ এয়াৰপৰ্টলৈ যোৱাৰ সাহস নাছিল। মানুহে মোক হুইল চেয়াৰত বহি থকা দেখিব, সেইটো ভাবিয়ে মই নাৰ্ভাছ হৈ পৰিছিলো। একেৰাহে দুমাহ ধৰি দাঁত ব্ৰাছও কৰিব পৰা নাছিলো। আৰু যোৱা ছমাহ ধৰি মই অসহ্যকৰ শাৰীৰিক বিষৰ সৈতে যুঁজিবলগীয়া হৈছে।’’
ঋষভে কয়, “সেই সময়ত আত্মবিশ্বাস আৰু মানসিক ধৈৰ্য্য বজাই ৰখাটোৱেই আছিল আটাইতকৈ গুৰুত্বপূৰ্ণ কাম। চাৰিওফালে হয়তো বহুত মানুহ থাকিব পাৰে, কিন্তু এজন ব্যক্তি হিচাপে নিজৰ কথা ভাবি সিদ্ধান্ত ল’ব লাগিব, যদি আপুনি যিকোনো নিৰ্দেশনা মানি চলে তেন্তে ই লাভজনক হ’ব। ইয়াৰ বাহিৰেও কোনো হেঁচাই মোক নতুনকৈ চিন্তা কৰিবলৈ বাধ্য কৰিব নোৱাৰিলে।''
Continue Reading
