ডিজিটেল ডেস্কঃ নতুন দিল্লীৰ আফগান দূতাবাস দেওবাৰৰ পৰা বন্ধ হৈ পৰিছে। তালিবানে এই বিষয়ত শনিবাৰেই এটা বিবৃতি জাৰি কৰিছিল। কিন্তু এনে সিদ্ধান্ত কিয়? তালিবান শাসিত ইছলামিক ৰিপাব্লিক অৱ আফগানিস্তানে দাবী কৰিছে যে ইয়াৰ আঁৰত ভাৰতৰ অসহযোগিতাই প্ৰধান কাৰণ। দূতাবাস বন্ধ কৰাকলৈ দুয়োখন দেশৰ মাজত দ্বিপাক্ষিক সম্পৰ্কৰ অৱনতি ঘটিব পাৰে বুলি আশংকা কৰা হৈছে।
বিবৃতিটোত কোৱা হৈছে, "অতি দুখ আৰু হতাশাৰ সৈতে আমি ঘোষণা কৰিছো যে নতুন দিল্লীৰ আফগান দূতাবাস বন্ধ কৰা হ'ব।" উল্লেখ্য দিল্লীৰ দূতাবাসত আফগান কৰ্মচাৰী আৰু বিত্তীয় সহায়ৰ অভাৱ হৈছে। তালিবানৰ এই বিবৃতিৰ পিছতে পাঁচজন আফগান কূটনীতিবিদে ভাৰত ত্যাগ কৰিছে।
তালিবানে দুবছৰ আগতে আফগানিস্তান দখল কৰিছিল। তেতিয়াৰে পৰা তালিবানকলৈ ভাৰতৰ উদ্বেগ বৃদ্ধি পাইছিল। ৯/১১ ৰ পিছৰ সময়ছোৱাত আফগানিস্তানৰ সৈতে ভাৰতৰ কূটনৈতিক সম্পৰ্ক পুনৰ শক্তিশালী হৈছিল। তেতিয়াৰে পৰা ভাৰতে আফগানিস্তানত বিনিয়োগো কৰিছে।
ঘাইপথৰ পৰা আফগান সংসদ, বিদ্যালয়, চিকিৎসালয়লৈকে সকলোতে ভাৰতে বিনিয়োগ কৰিছিল যদিও তালিবানৰ পৰা অহা তীব্ৰ ভাবুকিৰ পিছত ভাৰত-আফগান সম্পৰ্ক তিক্ত হৈ পৰে। এতিয়া ভাৰতত থকা আফগান দূতাবাস বন্ধ হোৱাৰ পিছত তালিবানৰ সৈতে যে ভাৰতৰ সম্পৰ্ক অধিক বেয়া হৈছে তাকেই প্ৰতীয়মান কৰিছে।
Continue Reading
