ডিজিটেল ডেস্কঃ বিহাৰত চুৰি হৈছে এটা ৰেল লাইন। এটা চুগাৰ মিলৰ পৰা মূল ৰেলপথৰ সৈতে সংযোগী এটা ৰেল লাইন চুৰি হৈছে! কিন্তু কেতিয়া চুৰি হ’ল সেয়া কৰ্তৃপক্ষই জানিব পৰা নাই।। এই ঘটনাত ৰে’ল সুৰক্ষা বাহিনীয়ে এফআইআৰ দাখিল কৰিছে। আৰ পি এফৰ দুজন জোৱানকো নিলম্বন কৰা হৈছে।
ৰেলৱেৰ সূত্ৰ অনুসৰি, প্ৰায় ২ কিলোমিটাৰ দৈৰ্ঘ্যৰ ৰেল লাইনটোৱে বিহাৰৰ সমষ্টিপুৰ জিলাৰ পণ্ডাউল ষ্টেচনৰ সৈতে লোহাট চেনি কলটো সংযোগ কৰিছে। সেই লাইনটোৱে চুৰি হৈছে। কেইবছৰমানৰ আগতে চেনি কলটো বন্ধ কৰি দিয়া হৈছিল বাবে ৰেল লাইনটোত মালবাহী যাতায়ত বন্ধ হৈ পৰিছিল। ইয়াৰ পিছতে ৰে’লপথটো চুৰি হোৱা বুলি ৰে’ল কৰ্তৃপক্ষই বিশ্বাস কৰে।
এই ঘটনা পোহৰলৈ অহাৰ পাছতহে সমষ্টিপুৰৰ ডি আৰ এম য়ে তদন্তৰ নিৰ্দেশ দিয়ে। তদন্তকাৰী দলো গঠন কৰা হৈছে। কৰ্তৃপক্ষই অনুমান কৰিছে যে আৰ পি এফৰ সমৰ্থন অবিহনে এই কাম কাৰ্যতঃ অসম্ভৱ হ’ব। চুৰিৰ লগত জড়িত থকাৰ অভিযোগত ২ আৰ পি এফ জোৱানকো নিলম্বন কৰা হৈছে।
উল্লেখ্য যে বিহাৰত পূর্বেও বিহাৰত চুৰি আৰু পেলনীয়া ৰে’লৰ অংশ বিক্ৰীৰ ঘটনা সংঘটিত হৈছে৷ কিন্তু ৰেলৱেৰ সূত্ৰই দাবী কৰিছে যে ২ কিলোমিটাৰ দৈৰ্ঘ্যৰ ৰেলপথ চুৰিৰ এইটোৱেই প্ৰথম ঘটনা।
Continue Reading
