ডিজিটেল ডেস্কঃ প্ৰতিবাদী মল্লযোদ্ধাসকলৰ ওপৰত দিল্লী আৰক্ষীৰ অত্যাচাৰক লৈ ক্ষোভিত হৈ পৰিছে কেইবাগৰাকীও ক্ৰীড়াবিদ। টকিঅ’ অলিম্পিকত সোণৰ পদক লাভ কৰা নীৰজ চোপ্ৰাই এই ঘটনাক গৰিহণা দিয়ে। এটা চুটি টুইটযোগে তেওঁ নিজৰ মনোভাৱ প্ৰকাশ কৰে।
সাক্ষী, বজৰংগ আৰু ভিনেশক গ্ৰেপ্তাৰ কৰাৰ ভিডিঅ’ পোষ্ট কৰি নীৰজে লিখিছে, ‘এয়া দেখি দুখ লাগিল। পৰিস্থিতিটো বেলেগ ধৰণে চম্ভালিব পৰা গ’লহেঁতেন৷’
ফুটবলাৰ সুনীল চেট্টী, ক্ৰিকেটাৰ ইৰফান পাঠান, অভিনৱ বিন্দ্ৰাইও ঘটনাটোক লৈ প্ৰতিক্ৰিয়া প্ৰকাশ কৰিছে। কয় যে ক্ৰীড়াবিদসকলক এইদৰে দমন চলোৱাৰ দৃশ্য বেদনাদায়ক। সমগ্ৰ বিষয়টো সোনকালে সমাধান কৰা উচিত।
উল্লেখ্য যে যোৱা ২৩ এপ্ৰিলৰ পৰা যন্তৰ মন্তৰত ব্রিজভূষণক গ্ৰেপ্তাৰ কৰাৰ দাবীত ধর্ণাত বহি আছে দেশৰ শীর্ষ মল্লযুঁজাৰুসকলে৷ ভিনেশ ফোগাট, সাক্ষী মালিক, বজৰং পুনিয়াই যৌন নিৰ্যাতনৰ অপৰাধত শীঘ্ৰে গ্ৰেপ্তাৰ কৰাৰ দাবীত আন্দোলন অব্যাহত ৰাখিছে।
Continue Reading
