ডিজিটেল ডেস্কঃ অৱশেষত গংগাত পদক বিসৰ্জন দিয়াৰ সিদ্ধান্ত বাতিল কৰিলে প্ৰতিবাদী মল্লযোদ্ধাসকলে। নৰেশ টিকাইটকে ধৰি কেইবাজনো কৃষক নেতাই তেওঁলোকক হৰিদ্বাৰত লগ কৰে আৰু পদক বিসৰ্জন নিদিবলৈ অনুৰোধ কৰে।
পদক বিসৰ্জন নিদিলেও মল্লযুঁজাৰুসকলে কেন্দ্ৰক পাঁচ দিনৰ সময়সীমা দিছে। পাঁচ দিনৰ ভিতৰত তেওঁলোকৰ দাবী পূৰণ নহ’লে পুনৰ গংগাত পদক দলিয়াই দিয়াৰ হুংকাৰ দিছে।
উল্লেখ্য যে মঙলবাৰে পুৱাই অলিম্পিকৰ পদক বিজয়ী সাক্ষী মালিকে পদক বিসৰ্জনৰ কথা কৈছিল। তেওঁ কৈছিল- ''এই পদক আমাৰ জীৱন। আজি সেইবোৰ গংগাত পেলাই দিয়াৰ পিছত আমাৰ জীৱন-যাপনৰ কোনো লাভ নাই। গতিকে পদকবোৰ পেলাই দিয়াৰ পিছত আমি ইণ্ডিয়া গেটৰ সন্মুখত অনশন কৰিম।"
তাৰপাছতে আবেলিলৈ হৰিদ্বাৰত উপস্থিত হৈছিল মল্লযোদ্ধাসকল। মল্লযুঁজাৰুসকলৰ ওচৰলৈ হৰিদ্বাৰৰ কেইবাজনো সাধু-সন্তও আগবাঢ়ি আহে। তেওঁলোকেও পদকসমূহ বিসৰ্জন নিদিবলৈ অনুৰোধ কৰে। সাধাৰণ জনতাইও মল্লযুঁজাৰুৰ সমৰ্থনত শ্লোগানেৰে উত্তাল কৰি তোলে।
হৰিদ্বাৰৰ হৰ কি পৌৰী ঘাটত মল্লযোদ্ধাসকলৰ মাজত আৱেগিক পৰিস্থিতিৰ সৃষ্টি হয়। সাক্ষী মালিক, বিনেশ ফগটে বুকুত পদকৰ বাকচত ৰাখি চকুলো টুকে। তেওঁলোকক পৰিয়ালৰ সদস্যই ঘেৰি ধৰে।
