ডিজিটেল ডেস্কঃ দূৰ্দান্ত শতকীয় ইনিংছেৰে এছেজৰ প্ৰথমখন মেচত উজ্বলি উঠিল অষ্ট্ৰেলিয়াৰ তাৰকা বেটাৰ ওছমান খাৱাজা। প্ৰথমদিনা ইংলেণ্ডে প্ৰথম ইনিংছত কৰা ৩৯৩ ৰাণৰ প্ৰত্যুত্তৰত খাৱাজাৰ ইনিংছটোৰেই অষ্ট্ৰেলিয়াই প্ৰত্যাহ্বানৰ সৃষ্টি কৰিবলৈ সক্ষম হৈছে।
বাতৰি লিখাৰ পৰলৈকে অষ্ট্ৰেলিয়াই ৮৩ অভাৰত ২৭২ ৰাণ সংগ্ৰহ কৰিছে। হেৰুৱাইছে পাঁচটা উইকেট। ব্যৰ্থ হয় টেষ্টৰ এক নম্বৰৰ বেটাৰ মাৰ্নাছ লাবুচেন। ষ্টুৱাৰ্ট ব্ৰ’ডৰ সন্মুখীন হৈ প্ৰথমটো আউট হয় লাবুচেন। লাবুচেনৰ পূৰ্বৰ বলটোত ব্ৰ’ডে লয় অপেনাৰ ডেভিড ৱাৰ্ণাৰৰ উইকেট।
অষ্ট্ৰেলিয়াৰ তাৰকা বেটাৰ স্টিভ স্মিথো ব্যৰ্থ হয়। ইংলেণ্ডৰ অধিনায়ক বেন ষ্ট’কছৰ বলত এলবিডব্লিউ হয় স্মিথ। কিন্তু ট্ৰেভিছ হিড (৫০) আৰু কেমেৰুণ গ্ৰীণে (৩৮) দলৰ স্ক’ৰক আগুৱাই নিয়ে। ইনিংছৰ আৰম্ভণিৰে পৰা ইংলেণ্ডৰ শক্তিশালী বলিঙক প্ৰতিহত কৰে অপেনাৰ ওছমান খাৱাজাই। বাতৰি লিখাৰ পৰলৈকে খাৱাজাই ২৪৪ টা বলত ১১৪ ৰাণ কৰি আছে। তেওঁক সুন্দৰ সহযোগিতা কৰিছে উইকেট ৰক্ষক এলেক্স কেৰীয়ে। কেৰীয়ে ৫০ টা বলত ৩১ ৰাণ কৰি আছে।
ইংলেণ্ডৰ হৈ ষ্টুৱাৰ্ট ব্ৰ’ড আৰু মইন আলীয়ে ২টা আৰু বেন ষ্ট’কছে এটা উইকেট লাভ কৰিছে। উল্লেখ্য যে অষ্ট্ৰেলিয়ান অপেনাৰ ডেভিড ৱাৰ্ণাৰক টেষ্টত ১৫ বাৰৰ বাবে আউট কৰিছে ষ্টুৱাৰ্ট ব্ৰ’ডে। আনহাতে, মাৰ্নাছ লাবুচেনে টেষ্ট কেৰিয়াৰত প্ৰথমটো ডাক আউটৰ সন্মুখিন হয়।
Continue Reading
