ডিজিটেল ডেস্কঃ টেষ্টত ৩২ সংখ্যক শতক অৰ্জন কৰে ষ্টিভ স্মিথে। লৰ্ডছত ইংলেণ্ডৰ বিৰুদ্ধে শতক অৰ্জন কৰে তেওঁ। ইয়াৰ দ্বাৰা অষ্ট্ৰেলিয়াৰ বেটছমেনৰ টেষ্ট শতক তালিকাত অষ্ট্ৰেলিয়াৰ প্ৰাক্তন অধিনায়ক ষ্টিভ ৱ’ক স্পৰ্শ কৰে তেওঁ। বৰ্তমান খেলি থকা অষ্ট্ৰেলিয়ান ক্ৰিকেটাৰসকলৰ ভিতৰত স্মিথে সৰ্বাধিক টেষ্ট শতক অৰ্জন কৰিছে।
জেমছ এণ্ডাৰছনৰ বলত কভাৰ ড্ৰাইভ মাৰি স্মিথে শতক অৰ্জন কৰে। অষ্ট্ৰেলিয়াৰ বেটছমেনগৰাকীয়ে নিজৰ কেৰিয়াৰৰ ৯৯ সংখ্যক টেষ্টত এই শতক অৰ্জন কৰে। এছেজৰ দ্বিতীয়খন মেচৰ প্ৰথম ইনিংছত স্মিথে ১৮৪ টা বলত সংগ্ৰহ কৰে ১১০ ৰাণ।
এই মুহূৰ্তত খেলি থকা ক্ৰিকেটাৰসকলৰ ভিতৰত শতক অৰ্জনৰ ক্ষেত্ৰত স্মিথৰ পিছতে আছে জ’ ৰুট। তেওঁ ৩০ শতক অৰ্জন কৰিছে। কেন উইলিয়ামছন আৰু বিৰাট কোহলীৰ নামত আছে ২৮টা শতক। ডেভিদ ৱাৰ্নাৰৰ হাতত আছে ২৫টা শতক।
উল্লেখ্য যে ২০১০ চনত লৰ্ডছত অভিষেক ঘটায় স্মিথে। পাকিস্তানৰ বিৰুদ্ধে সেই মেচখনত তেওঁ শূণ্য ৰাণতে আউট হৈছিল। কিন্তু লৰ্ডছ গ্ৰাউণ্ডতে ২০১৫ চনত ইংলেণ্ডৰ বিৰুদ্ধে ২১৫ ৰান সংগ্ৰহ কৰিছিল। বৃহস্পতিবাৰে লৰ্ডছত দ্বিতীয় শতক অৰ্জন কৰে স্মিথে।
Continue Reading
