ডিজিটেল ডেস্কঃ আজিৰে পৰা আৰম্ভ হৈছে এছেজ শৃংখলাৰ তৃতীয়খন টেষ্ট। হেডিংলিত অনুষ্ঠিত তৃতীয় টেষ্টৰ প্ৰথম দিনটোত ষ্টাম্পৰ ৰঙে ক্ৰিকেটপ্ৰেমীৰ দৃষ্টি আকৰ্ষণ কৰে। প্ৰতিটো ষ্টাম্পৰ তলৰ ফালে ৰামধেনুৰ ৰং থকা দেখা যায়। কিন্তু টেষ্টৰ দ্বিতীয় দিন অৰ্থাৎ শুকুৰবাৰৰ পৰা পুনৰ ষ্টাম্পৰ ৰং সলনি হ’ব। আগৰ দুখন টেষ্টত ষ্টাম্পৰ যি ৰং আছিল, সেই নীলা ৰঙকে দেখা যাব। কিন্তু প্ৰথমদিনা কিয় ষ্টাম্পৰ ৰং কিয় এনেকুৱা হৈছে? দ্বিতীয় দিনৰ পৰা কিয় সলনি হ’ব?
ইংলেণ্ড আৰু ৱেলছ ক্ৰিকেট ব’ৰ্ডে প্ৰতি বছৰে জুলাই মাহত ‘ৰেইনবো লেচ কেম্পেইন’ অনুষ্ঠিত কৰে। এই অভিযান LGBTQ+ সম্প্ৰদায়ৰ সমৰ্থনত কৰি আহিছে। সেই সময়ত সমগ্ৰ ইংলেণ্ডতে খেলা সকলো মেচতে ষ্টাম্পৰ তলৰ ফালে ৰামধেনুৰ ৰং থাকে। ইংলেণ্ডৰ ক্ৰিকেটাৰসকলক ৰামধেনু ৰঙৰ সূতা হাতত বান্ধি দিয়া হয়। অৱশ্যে কোনো ক্ৰিকেটাৰে ইচ্ছা কৰিলে নাবান্ধিবও পাৰে।
ইংলেণ্ড ক্ৰিকেট ব’ৰ্ডে এক বিবৃতিত কয় যে চলিত বৰ্ষৰ ১ জুলাইৰ পৰা ৬ জুলাইলৈ এই অভিযান চলি আছে। ৬ জুলাইৰ পৰা হেডিংলিত তৃতীয়খন টেষ্ট আৰম্ভ হৈছে। গতিকে টেষ্টৰ প্ৰথম দিনাই ষ্টাম্পবোৰ ৰামধেনু ৰঙৰ হয়। দ্বিতীয় দিন অৰ্থাৎ ৭ জুলাইৰ পৰা সেই ৰং আৰু নাথাকিব। বুধবাৰে অষ্ট্ৰেলিয়া আৰু ইংলেণ্ডৰ মহিলাৰ মাজত অনুষ্ঠিত হোৱা টি-২০ মেচতো ষ্টাম্পৰ ৰং একেই আছিল।
এই প্ৰসংগত ইংলেণ্ড ক্ৰিকেট ব’ৰ্ডে কয় যে সকলো ক্ৰিকেটাৰ তেওঁলোকৰ বাবে সমান- সেয়া ল’ৰা হওক, বা ছোৱালী হওক, বা এলজিবিটিকিউ+ সম্প্ৰদায়ৰ কোনোবাই হওক। এই অভিযানত ইংলেণ্ডৰ ক্ৰিকেটাৰসকলৰ সম্পূৰ্ণ সমৰ্থন তেওঁলোকৰ আছে বুলি ব’ৰ্ডে জনাইছে।
ইংৰাজ ক্ৰিকেটাৰ জো ৰুটে ক্ৰিকেট ব’ৰ্ডৰ এই পৰিকল্পনাক প্ৰশংসা কৰে। তেওঁ কয়- ''আমি দলীয় খেলত বিশ্বাস কৰোঁ। ইংলেণ্ডৰ সকলো খেলুৱৈ আমাৰ বাবে সমান। LGBTQ+ সম্প্ৰদায়ৰ খেলুৱৈসকলকো ক্ৰিকেটলৈ অহা দেখি আমি আনন্দিত হৈছো। আমাৰ সম্পূৰ্ণ সমৰ্থন আছে।''
Continue Reading
