এছিয়াৰ কোনখন দেশে ভাৰতৰ পৰা ক্ৰয় কৰিলে মিছাইল

নতুন দিল্লীঃ এছিয়াৰ অন্যতম বৃহৎ সামৰিক মহাশক্তি ভাৰতে নিজৰ চাহিদা পূৰণ কৰাৰ উপৰি আন দেশ সমূহলৈও সময়ে সময়ে ক্ষেপণাস্ত্ৰ ৰপ্তানি কৰি আহিছে। এইবাৰ ভাৰতৰ পৰা ৩৭৫ মিলিয়ন মিছাইল ক্ৰয়ৰ চুক্তি স্বাক্ষৰ কৰিছে ফিলিপাইনে। ফিলিপাইনৰ প্ৰতিৰক্ষা মন্ত্ৰীয়ে এই বিষয়ে নিশ্চিত কৰিছে। ফিলিপাইনে তেওঁলোকৰ নৌবাহিনীৰ পুনৰ্নিৰ্মাণ আৰু অধিক শক্তিশালী কৰাৰ উদ্দেশ্যে ভাৰতৰ পৰা জাহাজ বিৰোধী মিছাইল ক্ৰয় কৰাৰ সিদ্ধান্ত লৈছে। চুক্তি অনুসৰি, ভাৰতৰ ব্ৰাহ্মছ এৰোস্পেচ প্ৰাইভেট লিমিটেডে ফিলিপাইনছক তিনিটা বেটাৰি, ট্ৰেইন অপাৰেটৰ আৰু লজিষ্টিক ছাপোৰ্ট প্ৰদান কৰিব। ভাৰত আৰু ফিলিপাইনছৰ মাজত এই চুক্তিখন ২০১৭ চনতে স্বাক্ষৰ হোৱাৰ কথা আছিল। কিন্তু সেই সময়ত বিভিন্ন কাৰণত সেয়া সম্ভৱপৰ হৈ নুঠিল। পৰৱৰ্তী দুটা বৰ্ষত কৰ’নাই বিধি-পথালি দিয়া বাবে চুক্তিখন তেনেকৈয়ে পৰি ৰয়। উল্লেখ্য যে, ফিলিপাইনে তেওঁলোকৰ সামৰিক বাহিনীৰ আধুনিকীকৰণৰ বাবে ৫ বছৰীয়া প্ৰকল্প হাতত লৈছে। এই সময়ছোৱাত ৫.৮৫ বিলিয়ন ডলাৰ মূল্যৰ যুদ্ধ সামগ্ৰী ক্ৰয় কৰিব দেশখনে। মন কৰিবলগীয়া যে, ফিলিপাইনছৰ বৰ্তমান সম্বল বুলি ক’বলৈ গ’লে দ্বিতীয় বিশ্বযুদ্ধত ব্যৱহৃত যুদ্ধজাহাজ আৰু ভিয়েটনাম যুদ্ধত আমেৰিকা যুক্তৰাষ্ট্ৰই ব্যৱহাৰ কৰা সামৰিক হেলিকপ্টাৰে। সম্প্ৰতি ন ন প্ৰযুক্তি বিদ্যাৰে নিজকে অধিক শক্তিশালী ৰূপত গঢ় দিয়াৰে দুৰন্ত দুৰ্নিবাৰ স্বপ্ন দেখিছে এছিয়াৰ দেশখনে।