অ’মিক্ৰনৰ দাবানল, অধিক জটিল হোৱাৰ দিশে আমেৰিকাৰ পৰিস্থিতি

ৱাশ্বিংটনঃ কৰ’না ভাইৰাছৰ নতুন ষ্ট্ৰেইন অ’মিক্ৰনৰ দাবানলে আমেৰিকা যুক্তৰাষ্ট্ৰত ভয়ংকৰ ৰূপ ধাৰণ কৰিব পাৰে বুলি মন্তব্য কৰিছে আমেৰিকা যুক্তৰাষ্ট্ৰৰ শীৰ্ষ সংক্ৰামক ৰোগ বিশেষজ্ঞ এন্থনী ফাউছীয়ে। ফাউছীয়ে আমেৰিকা যুক্তৰাষ্ট্ৰত অ’মিক্ৰনৰ সংক্ৰমণৰ ওপৰত লক্ষ্য ৰাখি চেণ্টাৰ ফ’ৰ ষ্ট্ৰেটেজীক এণ্ড ইণ্টাৰনেচনেল ষ্টাডীজৰ উপ-সভাপতি জে ষ্টিফেন মৰিছনৰ সৈতেও কথা-বাৰ্তাত মিলিত হোৱা বুলি জানিবলৈ পোৱা গৈছে। অ’মিক্ৰনৰ সংক্ৰমণ ক্ষমতা অস্বাভাৱিক। চলিত মাহৰ শেষৰফালে ই ব্যাপক হাৰত বিয়পি পৰিব পাৰে বুলিও শংকা প্ৰকাশ কৰিছে ফাউছীয়ে। আমেৰিকাৰ যিসকলক ব্যক্তিয়ে ক’ভিড টিকা গ্ৰহণ কৰিছে বা বুষ্টাৰ পালিও লৈছে তেওঁলোকো অ’মিক্ৰনত আক্ৰান্ত হোৱাৰ পূৰ্ণ সম্ভাৱনা আছে বুলিও প্ৰকাশ পাইছে। অৱশ্যে, কিছুমান ব্যক্তিৰ ক্ষেত্ৰত হয়তো তেনে লক্ষণে দেখা নিদিবও পাৰে। কিন্তু অ’মিক্ৰনত আক্ৰান্ত ব্যক্তিৰ মৃত্যুৰ সম্ভাৱনা যথেষ্ট কম বুলি সদৰী কৰিছে ফাউছীয়ে। স্মৰ্তব্য যে, আমেৰিকা যুক্তৰাষ্ট্ৰত কৰ’না ভাইৰাছৰ টিকাকৰণ কাৰ্যসূচী প্ৰত্যাশা অনুসৰি দেশখনে আগবাঢ়িব পৰা নাই। বিশ্বৰ আগশাৰীৰ দেশখনতে এতিয়া অবাধ গতিত কৰ’নাৰ সংক্ৰমণ বৃদ্ধি পাইছে। দেশখনৰ এনে অস্বাভাৱিক পৰিস্থিতিয়ে সম্প্ৰতি উদ্বিগ্ন কৰি তুলিছে সংশ্লিষ্ট কৰ্তৃপক্ষক। টিকাকৰণ কাৰ্যসূচী আৰম্ভ হোৱাৰ পাছত কেইবাখনো ৰাজ্যত সাপ্তাহিক বঁটা পৰ্যন্ত ঘোষণা কৰিছিল চৰকাৰে। তথাপি, দেশখনৰ ৬৫ নিযুত লোকক এতিয়ালৈকে ক’ভিড টিকা গ্ৰহণ কৰা নাই।